Илон Маск Twitter’ни сотиб олиш фикридан қайтганидан сўнг тармоқ акциялари тушиб кетди
Маск бош директор лавозимида ишловчи Tesla компанияси акциялари ҳам олти ярим фоизга арзонлашган.
Tesla ва SpaceX раҳбари Илон Маск Twitter ижтимоий тармоғини сотиб олиш бўйича 44 миллиард долларлик келишувдан чиққани сабабли тармоқ акциялари ўн бир фоизга тушиб кетди. Бу ҳақда CNBS телеканали хабар бермоқда.
Телеканал маълумотларига кўра, Маск бош директор лавозимида ишловчи Tesla компанияси акциялари ҳам олти ярим фоизга арзонлашган. Ижтимоий тармоқ сохта аккаунтлар ва спам-ботлар ҳақида маълумот бермагани боис 9 июль куни Маск Twitter’ни сотиб олиш бўйича келишувни бекор қилди.
Маскнинг вакиллари ижтимоий тармоқни Tesla ва SpaceX раҳбари билан келишувнинг бир қанча бандларини бузганликда айблади. Шу куни Twitter акциялари нархи савдоларда етти фоизга тушиб кетди.
Bloomberg нашри воқеадан хабардор манбаларига таяниб хабар беришича, келишув бекор қилинганидан сўнг Twitter раҳбарияти SpaceХ ва Tesla асосчисини судга беради.
«Ижтимоий тармоқ эгалари компанияларнинг қўшилиш ишларига ихтисослашган Wachtell, Lipton, Rosen & Katz адвокатларини ёллаган», — дейди нашр суҳбатдошлари.
Апрель ойи бошида Маск Twitter’нинг тўққиз-у икки фоиз улушини қўлга киритиб, тармоқнинг энг йирик акциядорлардан бирига айланди, шундан сўнг у Twitterни бутунлай сотиб олиш ва спам-ботларни ўчириб ташлаш режасини эълон қилди.
Шартнома лойиҳасига кўра, ижтимоий тармоқ акциядорлари ҳар бир оддий акция учун 54,20 доллардан олиши керак эди.
Reuters нашри маълумотларига кўра, 2 май кунги Twitter ҳисоботида айтилишича, сохта ёки спам аккаунтлар тармоқнинг умумий «монетизация қилинувчи ҳар кунги фаол фойдаланувчилари»нинг беш фоизидан камроғини ташкил қилади.
Бироқ Маск сохта аккаунтлар сонини аниқлаш учун ўзи тест ўтказишга қарор қилди. У юзта тасодифий аккаунтни танлаб, сохта аккаунтлар барча фойдаланувчиларнинг камида йигирма фоизини ташкил қилади, деган хулосага келди.
Май ойи ўрталарида миллиардер Twitter сохта аккаунтлар сони беш фоиздан ошмагани ҳақидаги ҳисобот бермагунга қадар битимни ёпмаслиги ҳақида огоҳлантирган эди.
Аввалроқ Илон Маскнинг жамоаси Twitter ижтимоий тармоғини сотиб олишини молиялаштириш бўйича инвесторлар билан ўтказилаётган музокараларни тўхтатганди.
Кейинчалик миллиардер микроблоглар платформасини сотиб олишдан бош тортди.
Агар Маск келишувдан қайтса, бу суд жараёнига сабаб бўлади. Шартнома шартларига кўра, Маск харидни бекор қилиш учун 1 миллиард доллар тўлаши керак.
Ҳуқуқий экспертларнинг тушунтиришича, агар келишувдан чиқиш сабаби компаниянинг асосий фаолияти билан боғлиқ бўлмаса, Маск Twitter’ни харид қилишга мажбурланиши мумкин.