Илон Маск Twitter’ни сотиб олиш бўйича музокараларни тўхтатди
Шартнома шартларига кўра, Маск харидни бекор қилиш учун 1 млрд доллар тўлаши керак.
Илон Маскнинг жамоаси Twitter ижтимоий тармоғини сотиб олишини молиялаштириш бўйича инвесторлар билан ўтказилаётган музокараларни тўхтатди. Бу ҳақда Washington Post газетаси учта манбага таяниб хабар бермоқда.
Уларнинг сўзларига кўра, Маск жамоаси сўнгги ҳафталарда ижтимоий тармоқдаги сохта аккаунтлар ва спам-ботлар ҳақидаги маълумотларни текшириш имкони йўқлиги сабабли Twitter бизнеси истиқболларини баҳолай олмаслиги ҳақидаги хулосага келганидан сўнг инвесторлар билан муҳокамани тўхтатган.
Twitter аввалроқ ижтимоий тармоқнинг корпоратив мижозлари учун маълумотлар базасидан транзакция маълумотларини иккинчи томонга узатган — у реал вақт режимида твитлар ёзувини, платформада нашрлар қилинадиган қурилмалар ва аккаунтлар сонини ўз ичига олади.
Газета суҳбатдошларидан бирининг сўзларига кўра, Маскнинг жамоаси тез орада келишув билан боғлиқ вазиятни тубдан ўзгартирувчи қарорлар қабул қилиши мумкин. Манбалар бу айнан қайси қарорлар эканига аниқлик кирита олмади.
Технологик компаниялар акцияларининг глобал сотилиши Маскнинг Twitter’ни сотиб олиш учун зарур бўлган маблағни йиғиш учун ишлатган соф бойлигига жиддий зарба берди.
Агар Маск келишувдан қайтса, бу суд жараёнига сабаб бўлади. Шартнома шартларига кўра, Маск харидни бекор қилиш учун 1 миллиард доллар тўлаши керак.
Ҳуқуқий экспертларнинг тушунтиришича, агар келишувдан чиқиш сабаби компаниянинг асосий фаолияти билан боғлиқ бўлмаса, Маск Twitter’ни харид қилишга мажбурланиши мумкин.
Twitter ва Маск: сўнгги воқеалар
Маскнинг провокацион твитлари ва оммавий изоҳлари масалаларни мураккаблаштиради. У Twitter раҳбариятини танқид қилди ва компания платформадаги ботлар сони ҳақида жамоатчиликни чалғитаётганини айтди.
Миллиардер қўшимча маълумотга эга бўлмагунча келишувни тўхтатиб қўйди. Twitter сотувни якунлаш ниятида. Кетма-кет етти савдо кунида пасайган акциялар 17 май, сешанба куни 2,9 фоизга ошиб, 38,47 долларни ташкил қилди.
Бу ҳали ҳам таклиф нархидан анча паст бўлиб, инвесторнинг келишувга шубҳа билан қарашини кўрсатади.
Аввалроқ Илон Маск Twitter’ни сотиб олишга камроқ шахсий пул сарфлаш йўлини қидираётгани ҳақида хабар берилганди. Шунингдек, миллиардер Twitter’ни айрим фойдаланувчилар учун пуллик қилишни таклиф этди.
Шунингдек, Microsoft асосчиси Билл Гейтс Tesla бош директори Илон Маск Twitter’ни сотиб олганидан кейин, айниқса, ижтимоий тармоқларда нотўғри маълумотлар тарқалишидан хавотир кучаяётган бир пайтда платформа қандай ўзгариши номаълумлигини айтди.
Шунингдек, Маск Twitter’ни сотиб олиш ишлари тугаганидан сўнг бир неча ой давомида компанияга вақтинчалик бош директор бўлиши мумкинлиги ҳақида хабар берилди.
Илон Маск инвесторлар учун Twitter’ни 2028 йилгача ривожлантириш бўйича тақдимот тайёрлади, унда Маск компаниянинг йиллик даромадини беш бараварга, яъни 26,4 миллиард долларгача оширишга ваъда берди.
Дунёнинг энг бой миллиардери Илон Маскнинг айтишича, Twitter билан тузилган битим «пастга қараб» қайта баҳоланиши мумкин.