Миллиардер Илон Маск Twitter микроблоглар платформасини сотиб олишдан бош тортди. Бу ҳақда Маскнинг адвокатлари баёнотига таяниб, Reuters хабар бермоқда.

Баёнотда Twitter 44 миллиард долларлик келишувнинг бир қанча бандларини бузгани даъво қилинган.

Баёнотга кўра, Twitter спам-ботлар ва сохта аккаунтлар ҳақидаги кўплаб маълумотлар сўровларига жавоб бера олмаган ёки жавоб беришдан бош тортган.

Маскнинг адвокатларига кўра, бундай маълумотлар бизнес фаолияти учун аҳамиятли ҳисобланади.

Агентлик маълумотларига кўра, Маск келишувдан воз кечган. Twitter қисман юқори лавозимли раҳбарларни ва истеъдодлар жамоасининг учдан бир қисмини ишдан бўшатишга қарор қилган, бу эса мавжуд бизнес ташкилотининг таркибий қисмларини сақлаб қолиш мажбуриятини бузган.

Twitter раҳбари Брет Тейлор судга мурожаат қилиш ниятида эканини маълум қилди.

Аввалроқ Илон Маскнинг жамоаси Twitter ижтимоий тармоғини сотиб олишини молиялаштириш бўйича инвесторлар билан ўтказилаётган музокараларни тўхтатганди.

Агар Маск келишувдан қайтса, бу суд жараёнига сабаб бўлади. Шартнома шартларига кўра, Маск харидни бекор қилиш учун 1 миллиард доллар тўлаши керак.

Ҳуқуқий экспертларнинг тушунтиришича, агар келишувдан чиқиш сабаби компаниянинг асосий фаолияти билан боғлиқ бўлмаса, Маск Twitter’ни харид қилишга мажбурланиши мумкин.