Twitter раҳбарияти SpaceX ва Tesla асосчиси Илон Маскни ижтимоий тармоқни сотиб олишдан бош тортгани учун судга мурожаат қилади. Бу ҳақда Bloomberg вазиятдан хабардор манбаларга таяниб ёзмоқда.

Ижтимоий тармоқ эгалари бирлашиш ҳолатларига ихтисослашган Wachtell, Lipton, Rosen & Katz адвокатларини ёллаган.

Улар Twitter’ни сотиб олиш бўйича суд мажлисида ишлаш учун Делавэр судининг собиқ канцлерлари — адвокатлар Билл Сэвитт ва Лео Стрейн ишлайдиган юридик фирмани танлаган.

Аввалроқ Илон Маскнинг жамоаси Twitter ижтимоий тармоғини сотиб олишини молиялаштириш бўйича инвесторлар билан ўтказилаётган музокараларни тўхтатганди.

Кейинчалик миллиардер микроблоглар платформасини сотиб олишдан бош тортди.

Агар Маск келишувдан қайтса, бу суд жараёнига сабаб бўлади. Шартнома шартларига кўра, Маск харидни бекор қилиш учун 1 миллиард доллар тўлаши керак.

Ҳуқуқий экспертларнинг тушунтиришича, агар келишувдан чиқиш сабаби компаниянинг асосий фаолияти билан боғлиқ бўлмаса, Маск Twitter’ни харид қилишга мажбурланиши мумкин.