Польша 2022 йил охиригача Россия нефтини импорт қилишни тўхтатмоқчи. Бу ҳақда мамлакат бош вазири Матеуш Моравецки маълум қилди.

«Биз шу йил охиригача Россия нефтидан фойдаланишни тўхтатиш учун қўлимиздан келганини қиламиз», — деди Моравецки 30 март куни бўлиб ўтган матбуот анжуманида.

Нефть импортини тўхтатиш қарори Россия энергетикасидан, жумладан кўмирдан бутунлай воз кечиш истагининг бир қисми сифатида қабул қилинди. Моравецки, Польша май ойи охиригача ундан воз кечиши мумкинлигига ишонади. Унинг таъкидлашича, Ғарбга кўмир сотишдан тушган даромад эвазига Россия «ўзининг ҳарбий арсеналини тўплади».

Қайд этилишича, Польша ўз энергиясининг қарийб 70 фоизини кўмирдан олади, унинг асосий қисми маҳаллий ишлаб чиқаришда қазиб олинади. Лекин мамлакат ҳамон Россиядан катта ҳажмда газ сотиб олади. «Газпром» билан узоқ муддатли шартнома 2022 йил тугайди ва Польша Норвегиядан газ олиш учун Болтиқбўйи суюлтирилган газ терминалидан фойдаланиши мумкин.

«Бугун биз қиммат рус газини Норвегиянинг жуда қиммат газига алмаштиришни хоҳлаймизми, деган савол туғилади», — деди бош вазир айни дамда Польша буни қилиши кераклигини қўшимча қилган ҳолда.

Узоқ муддатли истиқболда Варшава Норвегия газидан воз кечишни ва бошқа мамлакатлардан қиммат хомашё сотиб олмасликни режалаштирмоқда.

Россия Президенти Владимир Путин 23 март куни Европага газ етказиб бериш учун тўловларни «дўстона бўлмаган давлатлар» учун рублга ўтказишни талаб қилди — унга АҚШ, Европа Иттифоқи давлатлари, шунингдек, Германия, Япония, Канада, Микронезия, Янги Зеландия, Жанубий Корея, Сингапур, Тайван ва Украина ҳамда айрим Европа давлатлари (Албания, Андорра, Буюк Британия, Исландия, Лихтенштейн, Монако, Норвегия, Сан-Марино, Шимолий Македония, Черногория ва Швейцария) киради.

Италия бош вазири Марио Драги Путиннинг талабини «келишув шартларини бузиш» деб атади, Еврокомиссия раҳбари Урсула фон дер Ляйен эса Россия расмийлари шу йўл билан Европа Иттифоқи санкцияларини четлаб ўтишга уринаётганини айтди.

Путиннинг талаби Европада газ нархининг ошишига олиб келди. Британиянинг BFY Group’нинг маълум қилишича, ЕИ келаси қишгача газ омборларини тўлдириш учун 68 миллиард доллардан кўпроқ пул тўлаши керак.

Аввалроқ Қатар энергетика вазири Россия газининг ўрнини босиш имкони ҳозирча йўқлигини айтгани хабар қилинганди. Шунингдек, Германиянинг энг йирик энергетика компанияси Россиядан газ сотиб олишни тўхтатгани ҳақида хабар берилди.