Саудия Арабистони Байден ташрифидан кейин нефть бозорида мувозанатни сақлашга ваъда берди

АҚШ Саудия Арабистонининг барқарор иқтисодий ўсиш учун жаҳон нефть бозоридаги мувозанатни сақлаш мажбуриятини олқишлади.

Саудия Арабистонига АҚШ Президенти Жо Байден ташриф буюрганидан сўнг Ар-Риёд жаҳон нефть бозорида мувозанатни сақлашга ваъда берди. Бу ҳақда «Коммерсантъ» нашри хабар бермоқда.

АҚШ Президенти Жо Байденнинг Саудия Арабистонига ташрифи якунлари бўйича қўшма баёнотга кўра, АҚШ ва Саудия Арабистони барқарор глобал энергия бозорига содиқликларини яна бир бор тасдиқлади.

«Томонлар, айниқса, Украинадаги инқироз ва унинг оқибатларини ҳисобга олган ҳолда стратегик иқтисодий ва сармоявий ҳамкорлик муҳимлигини таъкидлади ҳамда барқарор глобал энергия бозорига содиқликларини яна бир бор тасдиқлади. Қўшма Штатлар Саудия Арабистонининг барқарор иқтисодий ўсиш учун жаҳон нефть бозоридаги мувозанатни сақлаш мажбуриятини олқишлади», — дейилади қўшма баёнотда.

Баёнот Оқ уй ва Саудия Арабистони матбуот агентлиги сайтларида чоп этилган.

Қайд этилишича, томонлар Украина мавзусида халқаро ҳуқуқ, ҳудудий яхлитлик ва миллий суверенитет муҳимлигини эътироф этган. АҚШ ва Саудия Арабистони БМТ Бош Ассамблеясининг ушбу масала бўйича резолюциясини қўллаб-қувватлашларини яна бир бор таъкидлаган.

Давлат раҳбарлари, шунингдек, Украина халқига ёрдам бериш ва ғалланинг эркин экспортини таъминлаш мажбуриятини олган.

Ҳаммаси бўлиб АҚШ ва Саудия Арабистони ўртасида инвестиция, энергетика, ахборот-коммуникация технологиялари, космик ва соғлиқни сақлаш соҳаларига доир ўн саккизта битим имзоланди.

Томонлар, шунингдек, киберхавфсизлик, иқлим муаммоларини ҳал қилишда стратегик шериклик ва энергия алмашинуви бўйича ҳамкорликни кенгайтириш, шунингдек, Эроннинг ядро қуролига эга бўлишининг олдини олишга келишиб олди.