Хитойнинг банк фаолиятини тартибга солиш комиссияси метаолам билан боғлиқ ноқонуний маблағ йиғиш схемалари ҳақида огоҳлантириш берди, мамлакат саноат ассоциацияси эса бу соҳадаги шубҳали битимларга қарши туришга ваъда берди.

Ушбу баёнотлар фонида ўзининг метаоламини қураётган Tencent 6,3 фоизга, Alibaba акциялари 4,3 фоизга тушиб кетди. Бу ҳақда Bloomberg ёзмоқда.

Қайд этилишича, Хитойнинг энг йирик технология компанияларини кузатиб борувчи Гонконгнинг Hang Seng Tech Index индекси икки сессияда 6 фоиздан кўпроқ пасайиб кетган.

Индекснинг пасайиши расмий Пекин етказиб бериш хизматларига ресторанлар учун тўловларни камайтиришни буюрганидан сўнг, Meituan етказиб берувчи гиганти акциялари 18 фоизга пасайишидан бошланди.

United First Partners раҳбари Жастин Тангнинг сўзларига кўра, Meituan’га бўлган тазйиқлар фонида инвесторлар «янги ислоҳотлар» келишидан қўрқиб қолган. Ушбу фикрни Core Pacific-Yamaichi тадқиқот бўлими раҳбари Кастор Панг ҳам қўллаб-қувватлаган.

Унинг сўзларига кўра, бозор репрессия таъсири остида бўлган технология компаниялари бизнесни аввалгидек ривожлантира олмаслигидан хавотирда, бу эса инвесторларнинг кайфиятига катта таъсир қилади.

Мамлакат банк регулятори IT-компанияларни спекулятив хусусиятга эга эканлигини кўрсатиб, маблағ тўплаш ва метаолам концепциясига тегишли инвестиция маҳсулотларидан фойдаланишдан огоҳлантирган. Давлат метаолам қўмитаси ушбу сектор реал иқтисодиётга хизмат қилиши кераклигини тушунтирган.

Alibaba тез орада ўзининг йил давомидаги молиявий кўрсаткичлари ҳақида ҳисобот беради, бу ҳукумат чекловлари технология компаниялари рентабеллигига қанчалик таъсир қилганини кўрсатиши керак.

Ўтган июль ойида Хитойнинг Tencent интернет гиганти ҳукуматнинг IT соҳасига мисли кўрилмаган босими остида 170 миллиард доллар йўқотганди. Жаҳон капиталлашувида ҳеч бир компания бунчалик пасаймаган. Ўтган йилнинг январь ойидан бери Tencent акциялари 40 фоизга тушиб кетди.

Аввалроқ Хитой озиқ-овқат етказиб бериш хизматларининг акциялари тушиб кетгани хабар қилинганди.