Давлат бюджети харажатларининг вазифа таснифида давлат ҳокимияти ва бошқаруви органлари учун ажратиладиган маблағлар динамикаси ҳамда ташқи қарз харажатлари юкламасида ўсиш тенденцияси кузатилмоқда. Бу ҳақда Иқтисодиёт ва молия вазирлиги томонидан ишлаб чиқилган Фискал стратегия таҳлилларида келтириб ўтилган.

2024 йилда давлат ҳокимияти ва бошқаруви органлари харажатлари 20,2 триллион сўмни ташкил этган бўлса, 2025 йилда бу кўрсаткич 22,4 триллион сўмга етган. 2026 йил учун кутилаётган ижро бўйича бу миқдор 25,8 триллион сўмни ташкил этиши мумкин.

Отабек Бакиров харажатлар бюджетда кўрсатилгандан ортиқча сарфланганига эътибор қаратган. Мутахассис, 2026 йилда бюджетдан 21,4 трлн ажратилган бўлса-да, йил охиригача 26 трлн сарфлаш кўзда тутилганини таъкидлайди. 2025 йилда 18,6 триллион ўрнига 22,4 триллион сарфланган.

Фискал стратегияга кўра, 2027 йил учун прогнозда мазкур харажатлар 24,5 триллион сўм бўлиши кутилмоқда.

2028 йилда эса бу кўрсаткич яна ошиб, 26,3 триллион сўмга, 2029 йилга бориб эса 28,1 триллион сўмга етиши мумкин.

Давлат қарзи фоизи ва бошқа харажатлар

2024 йилда давлат қарзи фоизларига 14,5 триллион сўм сарфланган бўлса, 2025 йилда бу рақам 18,1 триллион сўмга, 2026 йилда эса 23,8 триллион сўмга етди. Прогнозлар эса янада ташвишли: 2027 йилда бу харажатлар 29,4 трлн, 2028 йилда 38,2 трлн ва 2029 йилда нақд 48,5 триллион сўмни ташкил этиши мумкин.

Ўзини ўзи бошқариш органларини сақлаш ва ННТларни қўллаб-қувватлаш йўналишдаги харажатлар ҳам йилдан-йилга ўсиб боради. Ушбу йўналишда 2024 йилда 1,3 триллион сўм сарфланган бўлса, 2025 йилда 1,5 триллион сўм, 2026 йил кутилмасида харажатлар 1,6 триллион сўмни ташкил этиши мумкин. Прогнозларга кўра, бу кўрсаткич 2027 йилда 1,7 трлн, 2028 йилда 1,8 трлн ва 2029 йилга бориб 2 триллион сўмга етиши кутилмоқда.