Ўзбекистон ва Туркия халқаро юк ташувлари соҳасида E-Permit тизимини ишга туширади. Бу ҳақда Транспорт вазирлиги матбуот хизмати хабар берди.

Маълум қилинишича, тизим юкларни ташиш учун рухсатномаларни рақамлаштиришга қаратилган. 2021 йилнинг 31 март куни бўлиб ўтган Туркий тилли давлатлар ҳамкорлик кенгашининг норасмий саммити доирасида эришилган келишувларга мувофиқ Ўзбекистон Транспорт вазирлиги ҳамда Туркиянинг Транспорт ва инфратузилма вазирлиги рухсатнома бланкаларини электрон (E-permit) айирбошлаш тизими лойиҳасини ишга тушириш бўйича ҳаракатларни бошлаган.

Қайд этилишича, 2021 йилнинг июль ойида Халқаро автомобиль ташувлари масалалари бўйича ўзбек-турк қўшма комиссиянинг Тошкентда бўлиб ўтган йиғилишида юк ташувлари жараёнини жадаллаштириш мақсадида мамлакатлар ўртасида рухсатнома бланкаларини электрон (E-permit) айирбошлаш тизимини татбиқ этиш бўйича чора-тадбирларни амалга ошириш юзасидан вазифалар белгилаб олинган. Ушбу электрон тизимни амалиётга жорий этишнинг дастлабки босқичи доирасида томонлар ўртасида келишган ҳолда илк маротаба E-Permit тизимидан фойдаланиб синов автокарвони ташкил этилган.

Хабарга кўра, 6 ноябрь куни Ўзбекистондан йўлга чиққан автокарвон 10 ноябрь куни «Сарп» чегара ўтказиш пункти орқали Туркияга етиб борган. Автокарвон Туркиянинг транспорт ва инфратузилма вазирлиги мутасаддилари ҳамда божхона маъмурияти вакиллари томонидан кутиб олинган.

Аввалроқ Ўзбекистонда божхона тўловининг дастлабки қарорини олиш тадбиркорлар учун ихтиёрий қилиниши мумкинлиги хабар қилинганди. Шунингдек, Тошкентда Туркия компанияси билан электр энергияси бўйича 109 миллион долларлик лойиҳа амалга оширилиши ҳақида хабар берилди.