Ўзбекистондаги банклардан бирининг 100 фоиз улуши Россия банкига сотилди
Сотиш жараёнига хусусийлаштириш бўйича консультант сифатида Grant Thornton компанияси жалб этилди.
«Ўзагроэкспортбанк» устав капиталидаги 100 фоиз давлат акция пакети «Совкомбанк» томонидан сотиб олинди. Бу ҳақда Давлат активларини бошқариш агентлиги матбуот хизмати хабар берди.
Маълум қилинишича, «Ўзагроэкспортбанк» акциядорлик тижорат банкининг устав капиталидаги 100 фоиз давлат акция пакетини «Совкомбанк» (Россия) билан 4,0 миллион долларга сотиш юзасидан келишувга эришилганин.
Таъкидланишича, Президентнинг «2020–2025 йилларга мўлжалланган Ўзбекистон Республикасининг банк тизимини ислоҳ қилиш стратегияси тўғрисида» 2020 йил 12 майдаги фармонига мувофиқ ҳамда халқаро талаблардан келиб чиқиб, «Ўзагроэкспортбанк» фаолияти таҳлили (due diligence) натижалари ва хусусийлаштириш бўйича консультант тавсиясига кўра тижорат банкининг 100 фоиз давлат акция пакетини яхлит ҳолда, рақобатга асосланган оммавий ошкора сотув жараёни амалга оширилган.
Сотиш жараёнига хусусийлаштириш бўйича консультант сифатида Grant Thornton ва баҳолаш учун KPMG халқаро компаниялари жалб этилган.
Аввалроқ Алишер Усмоновга алоқадор компания «Капиталбанк»дан яна улуш сотиб олгани хабар қилинганди. Шунингдек, Самарқанддаги «Қизилтурук» олтин кони сотувга қўйилгани ҳақида хабар берилди.
