Ўзбекистонда 2022 йилда ташқи савдо айланмаси 46 миллиард 289,3 миллион долларни ташкил этиши кутилмоқда. Бу ҳақда Ҳисоб палатасининг 2022 йилги давлат бюджети юзасидан берган хулосасида сўз боради.

Қайд этилишича, ташқи савдо фаолиятини амалга ошириш учун яратилган қулай шарт-шароитлар ва экспортчиларни қўллаб-қувватлаш бўйича кўрилган чоралар ҳисобига 2022 йилда республикада ташқи савдо айланмаси 46 289,3 миллион долларни, шу жумладан экспорт ҳажми 20 172,5 миллион долларни ва импорт ҳажми 26 116,9 миллион долларни ташкил этиши кутилмоқда.

Таъкидланишича, экспорт ҳажми 2021 йилга нисбатан 19,0 фоизга ўсиб, ялпи ички маҳсулотнинг 27,2 фоизига, импорт ҳажми эса 9,5 фоизга ўсиб, ялпи ички маҳсулотнинг 35,2 фоизига тўғри келиши кутилмоқда.

Шунингдек, Ташқи савдо айланмаси сальдоси салбий баланс (- 5 944,4 миллион доллар) билан якунланиши баҳоланмоқда.

Аввалроқ Ўзбекистонда доллар курси 11 минг 321 сўмгача кўтарилиши мумкинлиги хабар қилинганди. Шунингдек, Ҳисоб палатаси 2022 йилги давлат бюджети юзасидан хулосасини эълон қилгани ҳақида хабар берилди.