Польша ҳукумати Россиядан газ етказиб бериш бўйича келишувни муддатидан аввал бекор қилди. Мамлакат йил охирида импортни тўлиқ тўхтатади. 

Польша ҳукуматининг стратегик энергетика инфратузилмаси бўйича вакили Пётр Наимский маълум қилишича, 2022 йилга мўлжалланган келишувга кўра, Польша Россиядан йилига 10 миллиард куб метргача газ олиши мумкин.

Унинг аниқлик киритишича, 13 май куни Польша ҳукумати Россия ҳукумати билан 1993 йилда имзоланган келишувни бузиш тўғрисида резолюция қабул қилган.

«30 йилдан сўнг Польша ва Россия ўртасидаги газ саноатидаги алоқалар тўхтади, деб айтиш мумкин», — деди Наимский Полша радиоси эфирида (ТАССдан иқтибос).

Унинг қўшимча қилишича, Ямал-Европа газ қувурининг Россиядан газ ташиладиган Польша ҳудудидаги қисмидан Германиядан газ импорт қилиш учун ҳам фойдаланиш мумкин. Шунингдек, газ ушбу участка орқали Польшанинг ўзига ҳам етказилади.

«Газ узатиш инфратузилмасининг ушбу қисми EuroPolGaz мулки ҳисобланади. Участканинг оператори, шунингдек, Польшадаги бутун газ узатиш тизими GAZ-Sistem ҳисобланади», — дея аниқлик киритди Пётр Наимский («РИА Новости»дан иқтибос).

Польшанинг Россияга қарши чоралари

Россия Украинага ҳарбий ҳужум бошлаганидан сўнг Польша ўз ҳаво ҳудудини ушбу мамлакат авиакомпаниялари учун ёпишини маълум қилди. Унга кўра, тақиқ 26 февраль ярим тундан бошлаб кучга кирди.

Шунингдек, Польша россиялик сармоядорлар билан ҳамкорлик қилишдан ҳам бош тортди. Польша инвестициялар ва савдо агентлиги (PAIH) мамлакатдаги Россия сармоялари ва инвесторларига хизмат кўрсатишни тўхтатди. Бу қарор ҳам Россиянинг Украинага ҳужуми бошланиши муносабати билан қабул қилинди.

Шундан сўнг Польша 2022 йил охиригача Россиядан нефть импорт қилишни тўхтатмоқчилигини маълум қилди.

«Биз шу йил охиригача Россия нефтидан фойдаланишни тўхтатиш учун қўлимиздан келганини қиламиз», — деди Моравецки 30 март куни бўлиб ўтган матбуот анжуманида.

Нефть импортини тўхтатиш қарори Россия энергетикасидан, жумладан кўмирдан бутунлай воз кечиш истагининг бир қисми сифатида қабул қилинди.

Польша Россия гахи учун рублда пул тўламоқчи эмаслиги маълум бўлди. Бунга жавобан «Газпром» Болгариянинг «Булгаргаз» ва Польшаньинг PGNiG компанияларига газ етказиб беришни ҳисоб-китоб рубльда амалга оширилмагани учун тўлиқ тўхтатди.

Қолаверса, Польша Европа Иттифоқи расмийларини босқиндан сўнг Украинани тиклаш учун санкцияга учраган россиялик «олигархлар»нинг активлари ва Россия банкининг музлатилган захираларини мусодара қилишга рухсат беришга чақирди.