Польша Европа Иттифоқи расмийларини босқиндан сўнг Украинани тиклаш учун санкцияга учраган россиялик «олигархлар»нинг активлари ва Россия банкининг музлатилган захираларини мусодара қилишга рухсат беришга чақирди. Бу ҳақда Financial Times нашрига Польша ташқи ишлар вазири ўринбосари Павел Яблонский маълум қилди.

«Биз сиёсий қарор қабул қилиниши керак, деб ҳисоблаймиз ва бу йўналишда ҳаракат қилмоқчимиз. Активларни абадий мусодара қилишга тайёрмиз», — деди у.

Нашрнинг ёзишича, таклиф Еврокомиссия томонидан яқиндан ўрганилмоқда, бироқ Европа Иттифоқининг айрим расмийлари жиноий жараёндан ташқари активларни мусодара қилиш йўлидаги жиддий қонуний тўсиқлар ҳақида огоҳлантирмоқда.

Адвокатларнинг қайд этишича, мусодара қилиш тартибини соддалаштириш хавфли прецедент ҳосил қилади ва мулк ҳуқуқини хавф остига қўяди.

«Ҳамма тушунадики, агар расмийлар музлатилган активларни ихтиёрий равишда мусодара қила бошласа, бу силлиқдир, аммо олигархлар ва Россия Марказий банкининг активлари гуманитар ёрдам ҳамда Украинани тиклаш учун ишлатилиши мумкинлиги аниқ», — деди Гудзон институти тадқиқотчиси Нейт Сибли нашрга берган интервьюсида.

Европа Комиссияси вакилининг айтишича, Европа Иттифоқининг санкциялари активларни музлатиш учун қонуний асос бўлиб хизмат қилади, бироқ уларни мусодара қилиш учун асос бўлмайди.

Шу билан бирга, расмийлар бундай активлар «тегишли миллий жиноий қонунчилик стандартларига жавоб берса, музлатиш ва мусодара қилиниши мумкин» ёки йўқлигини муҳокама қилмоқда.

Аввалроқ Франция Россия Марказий банкининг 22 миллиард евролик маблағларини, шунингдек, санкциялар остида қолган жисмоний шахсларнинг ҳисобларидаги 150 миллиард еврога яқин пулни музлатиб қўйганди.

Шунингдек, Швейцария ҳукумати ҳам Ғарб санкцияларига учраган россияликлар ва Россия компанияларнинг умумий қиймати 5,75 миллиард франк (6,17 миллиард доллар) миқдоридаги мулкини музлатиб қўйди.