«Газпром» Болгариянинг «Булгаргаз» ва Польшаньинг PGNiG компанияларига газ етказиб беришни ҳисоб-китоб рубльда амалга оширилмагани учун тўлиқ тўхтатди. Бу ҳақда Россия компанияси ўзининг Telegram-каналида хабар берди.

Компания хабарига кўра, 26 апрельдаги иш кунининг охирида «Газпром Экспорт» апрель ойида «Булгаргаз» (Болгария) ва PGNiG (Польша)дан газ етказиб бериш учун рубльда тўловларни қабул қилиб олмаган.

Маълумот учун, Россия Президенти Владимир Путиннинг фармонига кўра, 1 апрелдан бошлаб етказиб бериладиган газ учун тўловлар рубльда амалга оширилиши керак.

Етказиб беришнинг тўхтатилиши фонида Европада газ нархи 10 фоиздан кўпроққа кўтарилди. Москва вақти билан соат 09:10 ҳолатига кўра, Нидерландиядаги Европа TTF марказидаги газ фьючерслари 16,03 фоизга ўсди ва 119,8 еврога тушди.

Эслатиб ўтамиз, 23 март куни Президент Путин Россия газининг Европа ва бошқа «дўст бўлмаган давлатлар»га етказиб берилиши учун тўловларни рублга ўтказиш бўйича кўрсатма берди. 

Ой охирида у 1 апрелдан кучга кирган ушбу давлатлар билан ҳисоб-китобларнинг янги қоидаларини белгиловчи фармонни имзолади.

Шу муносабат билан «Газпром Экспорт» Булгаргаз ва PGNiG’ни 27 апрелдан Путин фармони билан белгиланган тартибда тўлов амалга оширилгунга қадар газ етказиб беришни тўхтатиб туриши ҳақида хабардор қилди.

Польшанинг PGNiG нефть ва газ концерни Россия томонининг талабини ихтиёрий деб ҳисоблади. Концерн Россия газини етказиб беришни тўхтатиш шартномани бузиш деб ҳисоблашга ваъда берди ва йўқотишлар учун компенсация талаб қилиш ҳуқуқига эга эканини таъкидлади.