Польша россиялик сармоядорлар билан ҳамкорлик қилмайди. Бу ҳақда Польша инвестициялар ва савдо агентлиги (PAIH) матбуот хизмати хабар берди.

Польша инвестициялар ва савдо агентлиги (PAIH) мамлакатдаги Россия сармоялари ва инвесторларига хизмат кўрсатишни тўхтатди. Бу қарор Россиянинг Украинага ҳужуми бошланиши муносабати билан қабул қилинган.

«Россиянинг Украинага қарши тажовузкорлиги муносабати билан PAIH Польшада фаолият юритаётган рус сармоялари ва инвесторларига хизмат кўрсатишни тўхтатмоқда», дейилади агентликнинг Twitter’даги саҳифасида эълон қилинган баёнотида.

Ташкилотнинг ҳамкорлик ва алоқа департаменти директори Марчин Грачикнинг Польша матбуот агентлигига айтишича, Минск ва Москвадаги PAIH офислари очиқлигича қолмоқда.

«Ёрдамга муҳтож бўлиши мумкин бўлган польшалик тадбиркорларнинг хавфсизлигини ҳисобга олган ҳолда, биз ҳозирча бу идораларни ёпишни режалаштирмаяпмиз», — деган Грачик.

Унинг қўшимча қилишича, Киевдаги PAIH савдо офиси «масофадан ишламоқда».

Польша инвестициялар ва савдо агентлиги Польша тараққиёт фонди гуруҳига киради. У Польшага тўғридан-тўғри хорижий инвестицияларни қўллаб-қувватлайди ва Польша сармояларини мамлакатга жойлаштириш билан шуғулланади.

Бундан олдин қатор хорижий компаниялар Россия билан ҳамкорлик қилишдан бош тортган эди. Буюк Британия, Канада, АҚШ, Австралия, Янги Зеландия ва Европа Иттифоқи давлатлари ҳам Россияга қарши санкциялар киритди.

Чекловлар Россиянинг етакчи банклари, «Аэрофлот» авиакомпаниялари, Россия темир йўллари учун жорий этилди. Бундан ташқари, АҚШ ва Буюк Британия Россия президенти Владимир Путин ва Россия ташқи ишлар вазири Сергей Лавровга нисбатан шахсий санкциялар жорий қилган. Уларнинг хорижий пул ҳисоблари ҳам блокланган.

Аввалроқ Польша Россия авиакомпаниялари учун ўз ҳаво ҳудудини ёпиши хабар қилинганди. Шунингдек, «Формула-1» Россия Гран-присини бекор қилгани ҳақида хабар берилди.