Қайси компаниялар биринчи бўлиб 5 трлн долларлик чегарадан ўтиши прогноз қилинди
Netflix, McDonald’s ва бошқа бир қатор брендлар рўйхатга киритилган компаниялар орасида йўқ.
Apple, Microsoft, Amazon, Tesla ва Nvidia 5 триллион долларлик чегарани бузган биринчи глобал компаниялар бўлиши мумкин. Бу ҳақда Европанинг етакчи брокери XTB ўзининг янги тадқиқотида маълум қилди.
XTB таҳлилчилари компанияларнинг 2010 йилгача бўлган тарихий бозор капиталлашувини кўриб чиққан ва кейин уларнинг ўртача йиллик ўсиш суръатларини таҳлил қилган. Шундай қилиб, уларнинг прогнозларига кўра, Apple 2028 йилда, Microsoft ва Amazon — 2035 йилга бориб, Tesla и Nvidia — 2066 йилга бориб 5 триллион доллар қийматига етиши мумкин.
Асосий даъвогарлардан ташқари, аср охирига келиб TSMC (2078 йилга келиб), Tencent (2083 йилга келиб) ва UnitedHealth (2090 йилга келиб) ҳам худди шундай муваффақиятга эриша олади. Тадқиқотчиларнинг таъкидлашича, Berkshire Hathaway, Visa, Samsung, Home Depot ва LVMH даромадлари 2100 йилга келиб 4 триллион доллардан сал камроқни ташкил этади.
Қайд этилишича, Netflix рўйхатга киритилган компаниялар орасида йўқ. XTB стриминг хизмати жуда катта рақобатга эга деб ҳисоблайди. Бундан ташқари, McDonald’s ва Starbucks бу кўрсаткичга эриша олмайди, чунки брендлар машҳурлигига қарамай, улар ўртача кўрсаткични намойиш этадилар.
Шунингдек, Saudi Aramco, Alphabet, PayPal, Alibaba, Meituan ва Meta ҳам рўйхатда йўқ. Meta 1 триллион доллар остонасида эди, бироқ 2021 йилнинг тўртинчи чораги учун ҳисобот эълон қилинганидан сўнг унинг акциялари 23 фоизга тушиб кетган ва у 250 миллиард доллар қийматини йўқотган. Компаниянинг капиталлашуви атиги 620 миллиард долларни ташкил этмоқда.
Таъкидланишича, 2018 йилда Apple бозор капиталлашуви 1 миллиард долларга етган ва 2021 йилда Dow Jones Industrial Average рейтингида бир йил ичида 41 фоизга кўтарилиб, энг йирик ўсишлардан бирини қайд этган. Tesla ҳам ажойиб динамикага эга: 2019 ва 2021 йиллар оралиғида унинг бозор қиймати 75 миллиард доллардан 1,1 триллион долларга кўтарилган.
Аввалроқ Alphabet капиталлашуви акциялар бўлиниши ҳақидаги хабарлар фонида деярли 2 триллион долларга ошгани хабар қилинганди. Шунингдек, Apple қиймати 3 триллион долларга етган тарихдаги илк компанияга айлангани ҳақида хабар берилди.
