Қозоғистоннинг Оқтов денгиз порти раҳбарияти Ўзбекистон компанияларининг юк ташиш бўйича аризаларини қабул қилишга тайёрлигини билдирди. Бу ҳақда «Дунё» ахборот агентлиги хабар берди.

Маълум қилинишича, бу бўйича келишув Ўзбекистоннинг Оқтов шаҳридаги бош консули ва «Оқтов тижорат денгиз порти» компаниясининг бошқарув раиси Абай Турикпенбоевнинг учрашуви чоғида эришилган.

Таъкидланишича, учрашувда Ўзбекистон маҳсулотларини Оқтов порти орқали яқин ва узоқ хориж мамлакатларига ташиш масалалари муҳокама қилинган.

Маълумот ўрнида, Оқтов денгиз порти Каспий денгизининг шарқий қирғоғида бир қанча халқаро транспорт йўлаклари кесишган жойда жойлашган бўлиб, қуруқ юкларни, хом нефть ва нефть маҳсулотларини шарқдан ғарбга, шимолдан жанубга Эрон, Туркия, Россия, Озарбайжон, Туркманистон йўналиши бўйича йилига 12 ой ва кунига 24 соат ташиш имконини беради.

Аввалроқ Хитойнинг Ганьсу провинциясида Тошкентнинг хорижий омборлари очилгани хабар қилинганди. Шунингдек, Хитойдан Ўзбекистонга биринчи блок-поезд қачон етиб келиши ҳақида хабар берилди.