Тим Кук иккинчи чоракда Iphone харидорлари сезиларли ўсганини маълум қилди
Маc ноутбуклари 10,3 фоиз, iPad планшетлари сотуви 1,9 фоизга камайган.
Appleʼнинг соф фойдаси 2022 йилнинг иккинчи чорагида 19,4 миллиард долларни ташкил этди, бу 2021 йилнинг шу даврига (21,7 миллиард доллар) нисбатан 10,58 фоиз ёки 2,3 миллиард долларга кам. Бу ҳақда Forbes нашри хабар берди.
Apple бош директори Тим Кук сентябрда якунланадиган учинчи чоракда даромадлар ўсишини ваъда қилди, бироқ компания кейинги ҳисобот даврлари учун прогнозлар бермади.
Даромадлар тўғрисидаги ҳисобот эълон қилинганидан сўнг Apple акциялари кенгайтирилган савдоларда деярли 3 фоизга ўсди, бу Wall Street Journal таҳлилчиларининг тахминларидан кўпроқ бўлди.
Даромад кутилган 82,81 миллиард доллар ўрнига 83 миллиард долларни ташкил қилди. Ҳар бир акцияга тақсимланган фойда эса 2021 йилнинг иккинчи чорагига нисбатан 8 фоизга камайди. Apple компаниясининг даромади ушбу чоракда 2 фоизга ўсди, таққослаш учун ўтган йилнинг шу давридаги ўсиш 36 фоизни, ўтган чоракда эса 8 фоиздан кўпроқни ташкил қилган.
Қурилмаларни сотишдан тушган даромад 2022 йил апрель-июнь ойларида 2021 йилнинг шу давридагига нисбатан 500 миллион долларга долларга камайган, хизматлар кўрсатишдан кўрилган фойда эса икки миллиард долларга ошган.
Компаниянинг сотиш бўйича етакчи маҳсулоти — iPhone смартфонлари иккинчи чоракда 40 665 дона сотилган, бу 2021 йилнинг шу даврига нисбатан 2,7 фоизга ёки 1 095 тага кўпроқ. Савдо ҳажми таҳлилчилар тахмин қилган 38,33 миллиард доллар ўрнига 40,67 миллиард долларни ташкил этган. Маc ноутбуклари 10,3 фоиз, iPad планшетлари сотуви 1,9 фоизга камайган.
Apple кейинги чорак учун расмий прогнозлар бермади.
«Умумий прогнозларга келсак, биз сентябрь чорагида баъзи заиф нуқталарга қарамай, даромад кўтарилишини кутмоқдамиз», — деган Тим Кук.
Унинг қўшимча қилишича, Apple иккинчи чорак давомида Android фойдаланувчиларини iPhone сотиб олишга ундашга эришган. Apple бош директори буни рекорд даражадаги ўтиш деб атади ва янги Apple фойдаланувчилари сони икки хонали фоизда кўпайганини қайд этди. Хизматлар сектори ушбу чоракликда Apple учун энг тез ўсаётган сегмент бўлди.
У ойлик обуналар, кафолатлар, Googleʼдан қидирув учун лицензия тўловлари ва iPhone иловалари дўкони даромадларини ўз ичига олади. Кукнинг таъкидлашича, Apple компаниясида 860 миллион амалдаги пуллик обуналар, жумладан Apple Music ва iCloud хизматлари мавжуд.
Apple апрель ойида эҳтиёт қисмлар тақчиллиги сабаб компания 4 миллиарддан 8 миллиард долларгача зарар кўриши ҳақида огоҳлантирган эди. Кук ҳозирда максимал зарар 4 миллиард доллардан кам бўлишини айтди.
Apple шунингдек, чорак давомида акцияларни қайтариб сотиб олиш ва дивидендларни тўлаш учун 28 миллиард доллардан ортиқ маблағ сарфлаганини маълум қилди. Январь ойида iPhone ишлаб чиқарувчисининг бозор қиймати қисқа вақт ичида 3 триллион доллардан ошганди.
Компания май ойида Saudi Aramco’га дунёнинг энг қиммат очиқ компанияси унвонини бой берди. Иқтисодиётнинг секинлашиши, фоиз ставкаларининг ошиши ва инфляциянинг ўсиши каби муаммоларига қўшимча равишда, компания Хитойда анти-COVID чекловлари сабаб пайдо бўлган таъминот муаммосига ҳам дуч келди.
Аввалроқ Apple янги ходимларни ишга ёллашни камайтирмоқчи, шунингдек, иш ҳақи харажатларини ҳам пасайтириш ниятида эканлиги хабар берилган эди. Шу тариқа, компания юз бериши мумкин бўлган иқтисодий турғунликка тайёрланаётганди. Ушбу хабардан сўнг Apple акциялари икки фоизга арзонлашган.