АҚШда Meta устидан 100 млрд долларлик даъво қўзғатилди
Огайо прокуратураси илгари Facebook номи билан танилган Meta’га қарши 100 миллиард долларлик даъво қўзғатди
АҚШнинг Огайо штати прокуратураси илгари Facebook номи билан машҳур бўлган Meta Platforms компанияни ўз алгоритмларининг болаларга таъсири ҳақида жамоатчиликни чалғитганликда айблаб, судга мурожаат қилди. Бу ҳақда The Wall Street Journal хабар берди.
«Facebook болаларимизга ғамхўрлик қиламан ва онлайн тролларни йўқ қиламан деб даъво қилди, лекин аслида фойда учун бошқа хатоларни келтириб чиқарди», — деди штат прокурори Дейв Йотс.
Даъво Meta ва Огайо штатидаги давлат хизматчиларининг пенсия тизимидаги баъзи инвесторлар номидан қўзғатилган. У 100 миллиард доллардан ортиқ зарарни қоплаш бўйича даъволарни ўз ичига олади. Бундан ташқари, даъвогарлар келажакда инвесторларни чалғитмаслик учун Meta компаниясидан ўз ишига жиддий ўзгаришлар киритишни талаб қилмоқда.
Даъво аризасида қайд этилишича, 29 апрелдан 21 октябргача Facebook ва унинг раҳбарлари қимматли қоғозлар тўғрисидаги федерал қонунни бузган. Компания акциялар нархини ошириш ва акциядорларни алдаш мақсадида ўз маҳсулотларининг вояга етмаганларга салбий таъсири ҳақида қасддан жамоатчиликни чалғитган.
Аввалроқ The Facebook Papers номли ҳужжат билан компанияга бир қанча айбловлар қўйилганди.
