«Билайн»га эгалик қилувчи компания манзили Бермуд оролларидан Буюк Британияга кўчирилади
Ҳолдингнинг энг йирик активи — Россиянинг «Вымпелком» компанияси.
«Вымпелком» операторига («Билайн» бренди) эгалик қилувчи Veon ўзининг бош ҳолдинг компаниясини Бермуд оролларидан Буюк Британияга кўчиришни режалаштирмоқда. Бу ҳақда ҳолдинг матбуот хизмати хабар берди.
Veon Буюк Британияда бош компанияга айланадиган янги масъулияти чекланган жамиятни ташкил этиш ниятида.
«Рўйхатга олишнинг Бермуд оролларидан Буюк Британияга ўтказилиши компанияни юқори корпоратив бошқарув стандартлари ва кучли ва шаффоф қонунчилик базасига эга юрисдикцияга жойлаштиради», дейилади пресс-релизда.
Штаб-квартираси Амстердамда жойлашган Veon, ўзгариш компанияга кўплаб бозорларда қаттиқ тартиб-қоидалар шароитида керакли мослашувчанликни беради, деб ҳисоблайди.
Veon ушбу ўзгариш натижасида ҳеч қандай салбий солиқ оқибатлари бўлмаслигига ишончи комил. Veon’нинг оддий акциялари ва ADR’лари Буюк Британиянинг янги бош компаниясига 1:1 ҳисобида алмаштирилади.
Veon ҳолдинги Россия ва Украина, шунингдек, Покистон, Жазоир, Қозоғистон, Ўзбекистон, Бангладеш, Қирғизистон, Арманистон ва Грузиядаги алоқа хизматларини кўрсатувчи операторларни бирлаштиради.
Ҳолдингнинг энг йирик активи — Россиянинг «Вымпелком» компанияси («Билайн» брендига эгалик қилади). Veon’нинг энг йирик акциядори Михаил Фридманнинг Alfa Group ва ҳамкорлари таркибига кирувчи LetterOne бўлиб, у 56,2 фоиз акцияларга эгалик қилади.
