Билл Гейтснинг компанияси ядро энергетикаси ва тиббиёт соҳасидаги лойиҳалар учун 750 млн доллар тўплади
Билл Гейтснинг TerraPower компанияси 750 млн доллар маблағ йиғди. Пул ядровий энергетика технологиялари ва ядро тиббиётидаги инновацияларни ривожлантиришга сарфланади.
Билл Гейтс томонидан асос солинган TerraPower атом энергетикаси ва тиббиёт соҳасидаги инновациялар учун 750 миллион доллар йиғди. Бу ҳақда CNBC хабар бермоқда.
Молиялаштириш босқичини Жанубий Кореянинг энг йирик энергия етказиб берувчиларидан бири SK ва Гейтс бошқарган. SK Гейтснинг компаниясига 250 миллион доллар сармоя киритган.
Пул ядровий энергетика технологиялари ва ядро тиббиётидаги инновацияларни ривожлантиришга сарфланади.
TerraPower бош директори Крис Левескнинг айтишича, унинг жамоаси «технологик ечимларни жорий қилмоқда ва буни бутун дунё бўйлаб инвесторлар эътиборга олмоқда».
«Ушбу ечимлар иқлим ўзгаришига қарши углеродсиз илғор ядровий энергетикадан тортиб, ядровий изотоплар ёрдамида саратонга қарши курашишгача бўлиши мумкин», — дейди у.
TerraPower Natrium тизимини тижоратлаштириш учун General Electric компаниясининг бўлими бўлган GE Hitachi Nuclear Energy билан ҳамкорлик қилмоқда.
У АҚШда қўлланиладиган анъанавий реакторларга қараганда кичикроқ реакторни ва керак бўлганда микрореакторга қисқа вақт ичида қувват ишлаб чиқаришни ошириш имконини берувчи эриган натрий тузи энергия сақлаш тизимини ўз ичига олади.
TerraPower ҳозирда Вайомингдаги кўмир билан ишлайдиган электр станциясида натрий реактор технологиясини намойиш қилиш устида ишламоқда, у тез орада фойдаланишдан чиқарилади.
Лойиҳа федерал ҳукумат билан ҳамкорликда АҚШ Энергетика вазирлигининг илғор реакторларни намойиш қилиш дастури орқали амалга оширилмоқда.
Аввалроқ Билл Гейтснинг TerraPower ядровий стартапи биринчи атом электр станциясини (АЭС) қуриш учун АҚШнинг Вайоминг штатидаги Кеммерер кончилар шаҳарчасини танлаганди. Қурилиш 4 миллиард долларга тушиши маълум қилинган.