Хитой Ғарб савдо чекловларини бузмаслик учун Россияга техника экспортини кескин қисқартирди, деди АҚШ савдо вазири Жина Раймондо. Унинг сўзларини The Washington Post нашри хабар қилмоқда.

Вазирнинг Хитой савдоси ҳақидаги сўнгги маълумотларга таяниб айтишича, март ойида Россияга Хитой ноутбукларини етказиб бериш 40 фоизга, смартфонлар экспорти учдан иккига (яъни 66 фоиздан кўпроққа), телекоммуникация тармоқлари учун ускуналар етказиб бериш 98 фоизга қисқарган.

«Мендан тез-тез бу экспорт назорати ишлайдими, деб сўрашади. Ва менимча, жавоб шартсиз, сўзсиз ҳа. Ўйлайманки, улар ишлайди, чунки бизда бутун дунё бўйлаб мамлакатларнинг кучли коалицияси назоратни амалга оширишда иштирок этади», — деди Раймондо.

Унинг сўзларига кўра, экспорт назорати остида бўлган тоифалар бўйича АҚШдан етказиб бериш 86 фоизга, Жанубий Кореянинг Россияга экспорти 62 фоизга, Финляндияники эса 60 фоизга камайган.

Экспорт чекловлари

WP қайд этишича, Россияга нисбатан жорий қилинган экспорт чекловларига АҚШ ишлаб чиқариш ускуналари ёки дастурий таъминотидан фойдаланадиган компаниялар риоя қилиши керак.

Санкциялар компьютер чиплари, телекоммуникация ускуналари, лазерлар, авионика ва денгиз техникаларини етказиб беришни тақиқлайди.

«Гарчи чекловлар маиший электроника учун тааллуқли бўлмасада, баъзи компаниялар технология маҳсулотларини Россияга этказиб беришни бутунлай тўхтатдилар», — дея тушунтирди нашр суҳбатлашган ҳуқуқшунослар.

Хитойнинг йирик компаниялари санкциялар туфайли Россия билан ҳамкорликни қисқартиришни бошлагани ҳақида май ойи бошида The Wall Street Journal манбалари хабар берган эди.

Уларнинг сўзларига кўра, етказиб бериш қисқарган, жумладан Lenovo ва Xiaomi ҳам.

«Хитой раҳбарияти бир томонлама санкцияларни қоралайди, бироқ корхоналар Ғарб давлатларининг таҳдидлари ва етказиб берувчилар босими туфайли уларни бузмасликка ҳаракат қилмоқда», дея таъкидлайди нашр.

Аввалроқ Хитой регуляторлари хорижий активларни АҚШнинг потенциал санкцияларидан ҳимоялаш йўлларини муҳокама қилиш учун банклар раҳбариятлари билан учрашганди.