IT Park Жиззахда корпоратив акселераторни ишга туширди
Ёш мутахассисларга ўз стартап лойиҳаларини тақдим этиш имконияти берилади
IT Park ташаббуси билан 1 ноябрдан бошлаб «Жиззах» ЭИЗ дирекцияси билан ҳамкорликда Ахборот технологиялари ва коммуникацияларни ривожлантириш вазирлиги ҳамда Жиззах вилояти ҳокимлиги кўмагида «Жиззах» эркин иқтисодий зонасида кейинчалик ишга жойлашиш имкониятига эга корпоратив акселератор учун аризалар қабул қилинмоқда. Бу ҳақда IT Park матбуот хизмати хабар берди.
Қайд этилишича, акселераторда «Nurli Toʻlqin Servis», «Evergreen Agriculture», «Mingyuan Silu Industry», «ADM Jizzakh» ва «Global Optical Communication Uzbekistan» каби ишлаб чиқариш компанияларининг турли бизнес муаммоларини ҳал қилиш учун инновацион лойиҳаларни ишлаб чиқишга қизиққан талабалар, ёш тадбиркорлар, стартап асосчилари ва ёш олимлар иштирок этишлари мумкин.
Маълум қилинишича, «Жиззах» эркин иқтисодий зонасидаги ишлаб чиқариш корхоналари барча манфаатдор акселератор иштирокчиларига фаолият ва ишлаб чиқариш жараёнларини ўрганиш имкониятини беради. Келгуси 6 ой давомида навқирон авлод вакилларига юқоридаги компанияларнинг тажрибали мутахассислари ҳамроҳ бўлиб, уларга стартапни ривожлантиришда ҳар томонлама ёрдам кўрсатади.
Белгиланган муддат тугагач, ёш мутахассисларга корхона раҳбарларига ишлаб чиқариш ишларини соддалаштириш бўйича ўз стартап лойиҳаларини тақдим этиш имконияти берилади. Энг яхши лойиҳалар муаллифлари потенциал бизнес ечимларини янада самаралироқ амалга ошириш учун стартап лойиҳасини биргаликда амалга ошириш бўйича таклиф олишлари мумкин бўлади.
Шунингдек, «Жиззах» эркин иқтисодий зонасидаги корпоратив акселератор ҳам ишлаб чиқариш корхоналари, ҳам лойиҳаларни бошқариш соҳасида бебаҳо тажриба орттириши мумкин бўлган иштирокчилар учун ўзаро манфаатли шартларда яратилган.
Таъкидланишича, корпоратив акселераторда иштирок этиш учун махсус ҳавола орқали ариза тўлдирилиши керак.
Аввалроқ Нукусда ёшлар учун стартап ғоялар танловига ариза қабул қилиш бошлангани хабар қилинганди. Шунингдек, Uzcard подкастерлар учун бизнес-инкубатор ишга тушириши ҳақида хабар берилди.