Марказий банк мижозларни идентификация қилишда фойдаланиладиган биометрик маълумотларни сақлаш бўйича янги талабларни жорий этди. Бу ҳақда регулятор матбуот хизмати хабар берди.

Тегишли қарор 1 август куни давлат рўйхатидан ўтказилиб, расмий эълон қилинган кундан эътиборан кучга кирган.

Янги талабларга кўра, тўлов тизими операторлари, тўлов хизматларини етказиб берувчилар, факторинг электрон платформалари ҳамда кредит бюролари мижозларни идентификация ва аутентификация қилишда фойдаланиладиган жисмоний шахсларнинг биометрик маълумотларини фақат Ўзбекистон ҳудудида сақлаши шарт.

Шу билан бирга, биометрик бўлмаган бошқа турдаги шахсга доир маълумотларни «Шахсга доир маълумотлар тўғрисида»ги қонун талабларига мувофиқ Ўзбекистон ҳудудидан ташқарида сақлаш ва уларга ишлов беришга рухсат берилади.

Марказий банк қайд этишича, ўзгартиришлар молия бозорида биометрик маълумотларни сақлаш бўйича ягона ҳуқуқий ёндашувни шакллантириш, шахсга доир маълумотларни ҳимоя қилиш ҳамда ахборот ва киберхавфсизликни кучайтиришга қаратилган.

Бундан олдин Вазирлар Маҳкамаси шахсга доир маълумотлар бир хил даражада ҳимоя қилинишини таъминловчи чет давлатлар рўйхатини тасдиқлаганди. Рўйхатга жами 49 та мамлакат киритилган бўлиб, уларга халқаро келишувлар асосида ишловчи ахборот тизимлари орқали шахсга доир ва эгасизлантирилган маълумотларни қўшимча рухсатсиз ҳамда ваколатли органни хабардор қилмасдан узатиш мумкин бўлади.