Ўзбекистон Ҳиндистон ва Эрон вакиллари билан Чобаҳор порти бўйича музокара олиб борди
Порт орқали ўтадиган юкларнинг хавфсизлигини таъминлаш ўрганилади.
Ҳиндистон, Эрон ва Ўзбекистон 14 декабрь куни Уммон кўрфазидаги портдан биргаликда фойдаланиш бўйича уч томонлама учрашув чоғида Эроннинг Чобаҳор порти атрофида жойлашган транзит ва транспорт йўлагини янада ривожлантириш масалаларини муҳокама қилди. Бу ҳақда Hindustantimes нашри хабар берди.
Бу Чобаҳор портидан биргаликда фойдаланиш бўйича уч томонлама ишчи гуруҳининг иккинчи виртуал учрашуви бўлиб, биринчи учрашувдан роппа-роса бир йил ўтиб ташкил этилди.
«Томонлар Чобаҳор портининг гуманитар инқирозлар даврида ҳамда минтақавий алоқаларни мустаҳкамлашдаги муҳим ролини қайд этди», дейилади Ҳиндистон Ташқи ишлар вазирлиги баёнотида.
Хабарга кўра, улар,шунингдек, Марказий Осиё ва Жанубий Осиё ўртасида Шаҳид Беҳести терминали, Чобаҳор порти орқали транзит юк ташиш ҳажмининг ортганини эътиборга олган ва транспорт йўлагини янада ривожлантириш масалаларини муҳокама қилган.
Транспорт вазирлиги матбуот хизматига кўра, йиғилишда Ўзбекистон транспорт вазирининг ўринбосари А.Мўминов, Эрон Ислом Республикаси йўл ва шаҳарсозлик вазирининг ўринбосари А.Сафаи ва Ҳиндистон портлари, кемасозлик ва денгиз йўллари вазирининг ўринбосари С.Франджа қатнашган.
Учрашув давомида Эрон ва Ҳиндистон вакиллари томонидан Чобаҳор порти инфратузилмасини ривожлантириш бўйича амалга оширилаётган инвестицион лойиҳалар, ҳамда хорижий давлатлар томонидан ушбу транспорт-транзит ва логистика хаби салоҳиятидан фойдаланиш шартлари юзасидан тақдимотлар ўтказилган.
Учрашув якунида томонлар Эроннинг Чобаҳор порти орқали юк ташувларини ташкил этиш, тарифларни оптималлаштириш, юкларни етказиб бериш муддати ва хавфсизлигини таъминлаш масалаларини ўрганиш бўйича биргаликда иш олиб боришга келишиб олган.
Маълумот ўрнида, Тошкентдан йўлга чиққан поезд Термиз орқали Афғонистоннинг Ҳирот шаҳридан ўтиб, Эрон ҳудудига кириб боради. Кейинги манзил эса Эроннинг Чобаҳор ва Бандар-Аббос порт шаҳарларидир. Ушбу портлар орқали Ўзбекистон денгизга чиқиш ва ўз маҳсулотларини бошқа давлатларга экспорт қилиш имкониятига эга бўлади. Таҳлилчиларнинг маълумотларига кўра, бир контейнернинг Тошкентдан Бандар-Аббосгача йўлкираси 2600-3000 долларга тенг. Бугунги кунда Ўзбекистон Тошкент— Бандар-Аббос йўналишидан 3 та темир йўл ва 2 та автомобиль йўллари орқали фойдаланмоқда.
