Ўзбекистон иқтисодиёти 9 ойда салкам 7 фоизга ўсди. Инфляция даражаси 5,9 фоизни кўрсатмоқда
Вазирлар Маҳкамаси Давлат бюджетининг 2021 йил 9 ойидаги ижроси тўғрисидаги ҳисобот берди.
Ўзбекистонда иқтисодиёти «ўз вақтида мувофиқлаштирилган фискал ва пул-кредит чоралари туфайли» 9 ойда 6,9 фоизга ўсган, ЯИМ ҳажми 519,8 триллион сўмни ташкил этди. Бу ҳақда Олий Мажлис Сенатининг йигирма иккинчи ялпи мажлисида тақдим этилган Давлат бюджетининг 2021 йил 9 ойидаги ижроси тўғрисидаги ҳисоботда маълум қилинди.
Қайд этилишича, иқтисодий ўсиш суръатлари саноатда 9 фоизни, қурилиш соҳасида 4,5 фоизни, қишлоқ хўжалиги, ўрмон хўжалиги ва балиқчилик соҳаларида 4,2 фоизни ҳамда хизмат кўрсатиш соҳасида 7,6 фоизни ташкил этган. «Иқтисодиётда ўсиш суръатларини таъминлашга қаратилган чора-тадбирлар натижасида» инфляция даражаси йил бошидан 5,9 фоизни ташкил этган.
Ҳисобот даврида Давлат бюджети даромадлари 116 триллион сўмни ташкил этиб, белгиланган прогноз 108,4 фоизга ёки 9 триллион сўмга ошириб бажарилган. Даромадлар 2020 йилнинг мос даврига нисбатан 21,6 триллион сўмга кўпайган.
Давлат бюджетининг 2021 йил 9 ойлик харажатлари давлат мақсадли жамғармаларисиз 130 триллион 265,1 миллиард сўмни ташкил этиб, аниқланган режа кўрсаткичларига нисбатан 95,8 фоизни ёки ЯИМга нисбатан 25,1 фоизни ташкил этган.
Маълумот учун, 2021 йилнинг ноябрь ойида истеъмол секторидаги товарлар ва хизматлар ўртача 1,2 фоизга қимматлашган. Йил бошидан истеъмол секторида нархларнинг ўсиш даражаси 8,6 фоизни, ўртача ойлик ўсиш даражаси эса 0,8 фоизни ташкил этган.
Ўзбекистон иқтисодиётининг 2021 йил якуни бўйича ҳолати баҳоланган ҳисоботда глобал тенденцияларни акс эттирувчи озиқ-овқат ва хом ашё нархлари босими туфайли инфляция юқори даражада сақланиб қолгани ва йил якунида тахминан 10 фоизни ташкил этиши кутилаётгани маълум қилинганди.
Шунингдек, Марказий банкнинг «Пул-кредит сиёсатининг 2022 йил ва 2023–2024 йиллар даврига мўлжалланган асосий йўналишлари»нинг дастлабки концептуал лойиҳасида макроиқтисодий ривожланишнинг асосий сценарийсидаги бир қанча омиллар ва тартибга солинадиган нархларни эркинлаштириш даражасидан келиб чиқиб инфляция суръатларининг 2022 йилда 8–9 фоизни ташкил этиши, 2023–2024 йилларда эса 5 фоизгача пасайиши кутилаётгани қайд этилганди.
