Ўзбекистонда авиаюкларни ташишни электрон расмийлаштириш платформаси «е-Freight» халқаро стандарти жорий этилади. Бу ҳақда Транспорт вазирлиги матбуот хизмати хабар берди.

Маълум қилинишича, Транспорт вазирлиги томонидан «Uzbekistan Airports» компанияси иштирокида «е-Freight» юк ташувларини электрон расмийлаштириш ахборот платформасини жорий этиш ва электрон ҳужжатлардан фойдаланган ҳолда «ягона дарча» режимида назорат-текширув функцияларини амалга ошириш масалаларига бағишланган семинар бўлиб ўтган.

Қайд этилишича, Ўзбекистонда авиаюкларни ташиш соҳасида электрон ҳужжат айланмасига ўтишга ҳозирлик кўрилмоқда. Қатор вазирлик ва идоралар вакиллари учун халқаро экспертлар иштирокида ўтказилган ушбу семинар мазкур жараённи амалга ошириш бўйича «йўл харитаси»нинг биринчи босқичи бўлди.

Таъкидланишича, электрон ҳужжат айланмасига ўтиш нафақат миллионлаб дарахтларни сақлаб қолиш,  балки товарларни етказиб бериш жараёнини соддалаштириш ва тартиб-таомилларни имкон қадар шаффоф қилиш имконини беради.

«‘E-Freight’ — бу IATA томонидан тавсия этилган ва дунёнинг кўплаб мамлакатларида қабул қилинган халқаро стандарт. Мазкур платформанинг Ўзбекистонда жорий этилиши хорижий логистика  компаниялари ва авиаташувчилар учун аэропортларимиз рақобатбардошлиги ва жозибадорлигини сезиларли даражада оширади», — деган «Uzbekistan Airports» бошқаруви раиси Раъно Жўраева.

Семинар доирасида экспертлар «е-Freight» стандартини жорий этиш бўйича халқаро тажриба ва натижалар,  давлат чегараси орқали ўтиш пунктларида назорат-текширув функцияларини амалга ошириш технологиясини ўзгартириш борасида талаблар,  шунингдек авиаташувларга оид электрон ҳужжатларни расмийлаштириш ва юритиш амалиёти ҳақида сўз юритган.

Аввалроқ Uzbekistan Airports хорижий авиакомпаниялар учун тарифларни пасайтириши хабар қилинганди. Шунингдек, Ўзбекистон аэропортларида мультипортли бошқарув тизими жорий этилиши ҳақида хабар берилди.