Ўзбекистонда цемент ишлаб чиқарувчиларнинг фойда солиғи ставкасини пасайтириш таклиф қилинди
Қабул қилинган ўзгаришлар корхоналар ва истеъмолчиларнинг даромадлари ошишига хизмат қилади
Ўзбекистонда цемент ишлаб чиқарувчи корхоналарнинг фойда солиғи ставкасини 20 фоиздан 15 фоизга пасайтириш таклиф қилинди. Бу ҳақда Олий Мажлис Қонунчилик палатаси матбуот хизмати хабар берди.
Маълум қилинишича, Қонунчилик палатасининг навбатдаги мажлисида «Ўзбекистон Республикасининг Солиқ кодексига ўзгартиш ва қўшимчалар киритиш тўғрисида»ги қонун лойиҳасининг муҳокамаси бўлиб ўтган. Таклиф этилаётган қонун лойиҳаси билан Ўзбекистон Солиқ кодексининг бир қатор моддаларига қўшимча киритиш таклиф қилинмоқда.
Хусусан, кодекснинг 337 ва 452-моддаларига 2021 йил 1 октябрдан бошлаб цемент (клинкер) ишлаб чиқаришни амалга оширувчи корхоналарга белгиланган 20 фоизлик фойда солиғи ставкасини 15 фоизга пасайтириш таклиф қилинган. Шунингдек, 2022 йил 1 январдан бошлаб эса цемент ишлаб чиқаришга мўлжалланган 1 тонна оҳактош учун ер қаъридан фойдаланганлик учун солиқ ставкасини икки бараварга камайтириш таклиф қилинмоқда.
Қайд этилишича, қонун лойиҳасининг қабул қилиниши қурилиш материалларини ишлаб чиқарувчи корхоналар ҳамда қурилиш материаллари истеъмолчилари бўлган аҳолининг даромадлари ошишига хизмат қилади. Шу билан бирга, муҳокамалардан сўнг, қонун лойиҳаси депутатлар томонидан қабул қилинган.
Аввалроқ Ўзбекистонда цемент нархи йил бошига нисбатан арзонлашгани хабар қилинганди. Шунингдек, Оҳангаронда 200 миллион долларлик цемент заводи қурилиши бошлангани ҳақида хабар берилди.
