Ўзбекистон Ички ишлар вазирлигига тегишли «топилмалар столи»ни тугатиш ҳамда йўқолган нарсаларни қабул қилиш функцияларини Давлат хизматлари агентлигига ўтказиш таклиф қилинмоқда. Бу ҳақда Вазирлар Маҳкамаси қарори лойиҳаси муҳокамага қўйилди.

Унга кўра, 2022 йил 1 мартдан бошлаб Давлат хизматлари марказлари томонидан йўқолган ва топиб олинган ашёларни қабул қилиш, сақлаш, эгаларига қайтариш ёки уларни давлат архив идораларига топшириш бўйича давлат хизматларини кўрсатиш йўлга қўйилиши белгиланмоқда.

Қайд этилишича, йўқотилган ашёларни қидириш бўйича мурожаатлар Ягона интерактив давлат хизматлари портали oрқaли ҳам қабул қилинади.

Шунингдек, 2022 йил 1 мартга қадар «Топилмалар» автоматлаштирилган қидирув тизими жорий этилади. Ушбу тизим ЙИДХП билан интеграция қилинади.

Аввалроқ «Ўзбекнефтгаз» барча харидлар электрон шаклга ўтказилишини маълум қилгани ҳақида хабар берилганди. Шунингдек, Ўзбекистонда суғуртанинг барча турлари электрон амалга оширилиши хабар қилинган.