Forbes журнали АҚШнинг асосий хайриячи миллиардерларининг янги рейтингини тақдим этди. Рўйхатда Уоррен Баффет етакчилик қилмоқда. Шунингдек, Билл Гейтс, Жорж Сорос, Марк Цукерберг ва бошқалар рейтингдан жой олган.

Уоррен Баффет

• Даромад манбаи: Berkshire Hathaway
• Молиявий ҳолати: 115,6 миллиард доллар
• Хайриянинг асосий йўналишлари: соғлиқни сақлаш, қашшоқликка қарши кураш
• Хайрияларнинг умумий суммаси: 46,1 миллиард доллар

Баффет тарихдаги энг йирик хайриячидир. Унинг 46 миллиард долларлик хайрияларининг катта қисми дўстлари Билл ва Мелинда Френч Гейтсларнинг фондига ўтказилган. Ушбу маблағлар қашшоқликни бартараф этиш, ривожланаётган мамлакатларда соғлиқни сақлашни яхшилаш ва АҚШ таълим тизимига хайрия қилинган.

Билл ва Мелинда Френч Гейтс

• Даромад манбаи: Microsoft
• Молиявий ҳолати: 133,3 миллиард доллар ва 6,1 миллиард доллар
• Хайриянинг асосий йўналишлари: соғлиқни сақлаш, қашшоқликка қарши кураш
• Хайрияларнинг умумий суммаси: 33,4 миллиард доллар

Гарчи 2021 йил Гейтслар 27 йиллик турмушдан кейин ажрашган бўлса-да, улар Билл ва Мелинда Гейтс жамғармасининг раислари бўлиб қолмоқда. Уларнинг деярли барча хайриялари айнан ушбу фонд орқали ўтади.

Жорж Сорос

• Даромад манбаи: хеж-фондлар
• Молиявий ҳолати: 8,6 миллиард доллар
• Хайриянинг асосий йўналишлари: демократия, таълим, дискриминацияга қарши кураш, соғлиқни сақлаш
• Хайрияларнинг умумий суммаси: 18,1 миллиард доллар

Сорос «Очиқ Жамият» жамғармалари иқтисодий тенглик, инсон ҳуқуқлари, дискриминацияга қарши кураш, суд-ҳуқуқ ислоҳотлари ва журналистика каби соҳаларни қўллаб-қувватлайди.

Майкл Блумберг

• Даромад манбаи: Bloomberg LP
• Молиявий ҳолати: 70 миллиард доллар
• Асосий йўналишлар: иқлим ўзгариши, соғлиқни сақлаш
• Хайрияларнинг умумий суммаси: 12,7 миллиард доллар

Bloomberg Philanthropies маълумотларига кўра, Нью-Йоркнинг собиқ мери ва Bloomberg LP асосчиси 12 миллиард доллардан ортиқ хайрия қилган. Асосий йўналишлар иқлим ўзгариши, қурол-яроғ назорати ва жамоат саломатлиги. Сўнгги ўн йил ичида у жамиятда тамаки истеъмолини камайтириш учун 1 миллиард доллардан кўпроқ маблағ сарфлади. Шунингдек, 2018 йилда ўзининг ўқиш жойи бўлган Жон Хопкинс университетига 1,8 миллиард доллар хайрия қилишини эълон қилди.

Маккензи Скотт

• Даромад манбаи: Amazon
• Молиявий ҳолати: 53,5 миллиард доллар
• Асосий йўналишлар ирқий, гендер ва иқтисодий тенгсизликка қарши кураш
• Хайрияларнинг умумий суммаси: 8,61 миллиард доллар

Скотт Medium’да янги пост жойлаштирса, у бутун хайрия дунёсининг эътиборини тортади. Amazon асосчиси Жефф Безоснинг собиқ рафиқаси веб-сайтга эга эмас, у ажрашганидан кейин олган улкан бойлигини тарихдаги бошқа миллиардерларга қараганда тезроқ беришга уриниши натижаларини ёзиб бориш учун блогдан фойдаланади.

Чак Фини

• Даромад манбаи: Duty Free Shoppers
• Молиявий ҳолати: 2 миллион доллардан кам
• Асосий йўналишлар: фан, инсон ҳуқуқлари, ёшлар билан ишлаш
• Хайрияларнинг умумий суммаси: 8 миллиард доллар

Собиқ миллиардер банкротлик ҳолатида вафот этишни ўз олдига мақсад қилиб қўйган. 1960 йилда Duty Free Shoppers чакана савдо тармоғига асос солган Фини ўз бойлигининг бир қисмини аноним равишда хайрия қилиб юборган.

Кейинчалик эса у бутун дунёга ўзининг «Ҳаётда улашиш» ғоясини тақдим қилди. Ўз навбатида, бу ғоя Гейтс ва Баффет каби миллиардерларни хайрияга ундаган.

Гордон ва Бетти Мур

• Даромад манбаи: Intel
• Молиявий ҳолати: 11,1 миллиард доллар
• Хайрия йўналиши: фан, атроф-муҳит, беморларни парвариш қилиш, Сан-Франсиско кўрфази
• Хайрияларнинг умумий суммаси: 5,5 миллиард доллар

Intel асосчиси ва собиқ бош директори рафиқаси билан биргаликда 2000 йилда ўз фондини яратиб, компания акцияларининг бир қисмини унга ўтказган. 2021 йил сентябрь ойида Moore Foundation саккизта бошқа ташкилотга (жумладан, Bezos Earth Fund ва Bloomberg Philanthropies) қўшилиб, ўн йил давомида биохилма-хилликни сақлашга 5 миллиард доллар хайрия қилишини маълум қилди.

Фил Найт ва унинг оиласи

• Даромад манбаи: Nike
• Молиявий ҳолати: 54,8 миллиард доллар
• Асосий йўналиш: таълим
• Хайрияларнинг умумий суммаси: 3,1 миллиард доллар

Forbes 2021 йил январдан бери Nike асосчисининг барча хайриялари умумий суммасини 1,9 миллиард долларга оширди. Бу биринчи навбатда унинг учта университетга 2,5 миллиард доллардан кўпроқ маблағ тўлаётгани ҳақидаги янги маълумотлар билан боғлиқ.

Марк Цукерберг ва Присцилла Чан

• Даромад манбаи: Meta
• Молиявий ҳолати: 112,8 миллиард доллар
• Хайриянинг асосий йўналишлари: фан, таълим, жиноий судлов
• Хайрияларнинг умумий суммаси: 3 миллиард доллар

Meta Platforms (собиқ Facebook) бош директори ва унинг рафиқаси Присцилла Чан барча касалликларни даволаш, олдини олиш ва назорат қилиш каби бир қанча улкан мақсадларга эга. Таъкидланишича, уларнинг The Chan Zuckerberg Initiative (CZI) ташкилоти 2015 йилда иш бошлаганидан бери илмий ва тиббий тадқиқотлар, шунингдек, таълим ва жиноий адлия ислоҳотларини қўллаб-қувватлаш учун 3 миллиард доллар грант ажратган.

Майкл ва Сьюзан Делл

• Даромад манбаи: Dell компьютерлари
• Молиявий ҳолати: 60,3 миллиард доллар
• Асосий йўналишлар: қашшоқликка қарши кураш, таълим
• Хайрияларнинг умумий суммаси: 2,25 миллиард доллар

Майкл ва Сюзан Делл жамғармаси 1999 йилда ташкил этилганидан бери 2,25 миллиард доллардан кўпроқ маблағ сарфлади. Ушбу маблағ АҚШ, Ҳиндистон ва Жанубий Африка шаҳарларида қашшоқликда яшовчи болаларга ёрдам бериш учун йўналтирилган.

Аввалроқ 2021 йилнинг ноябридан бери энг «қашшоқлашган» криптомиллиардерлар маълум қилинганди.