Давлат статистика ишлари дастурига мувофиқ Давлат статистика қўмитаси томонидан 2021 йил январь-сентябрь ойлари учун Қорақалпоғистон, вилоятлар ва Тошкент шаҳри бўйича ялпи ҳудудий маҳсулот (ЯҲМ)ни дастлабки баҳолаш ишлари амалга оширилди. Қўмита матбуот хизмати бир қанча кўрсаткичлар бўйича ҳисоботларни эълон қилди.

Маълум бўлишича, 2021 йилнинг январь-сентябрь ойларида республика бўйича ЯИМнинг шаклланишида Тошкент шаҳри 16,9 фоиз улуш билан энг катта ҳисса қўшган. Тошкент вилояти 11 фоиз ва Навоий вилояти 8,1 фоиз кўрсаткичлар билан кейинги ўринларни эгаллаб турибди. Республика ЯИМини шакллантиришда энг кам улуш Сирдарё (2,1 фоиз) ва Жиззах (3,1 фоиз) вилоятларига тўғри келган.

Ахборотга кўра, 2021 йилнинг январь-сентябрь ойларида Тошкент шаҳрида (114,1 фоиз), Сирдарё (111,6 фоиз), Тошкент (109,6 фоиз), Хоразм (108,5 фоиз) ва Қашқадарё (108,4 фоиз) вилоятларида юқори ўсиш суръатлари қайд этилган.

Шунингдек, 2021 йил январь-сентябрь ойлари якунларига кўра, кичик бизнеснинг республика ЯИМидаги улуши 55,7 фоизни ташкил этган. Ҳудудларда кичик бизнеснинг энг катта улуши Жиззах (ҳудудда яратилган ялпи қўшилган қиймат умумий ҳажмининг 81,7 фоизини ташкил этган), Сурхондарё (78,1 фоиз) ва Бухоро (76,8 фоиз) вилоятларида кузатилган. Кичик бизнеснинг энг кам улуши Навоий (27,3 фоиз) ва Тошкент (47,8 фоиз) вилоятларида қайд этилган.

Аввалроқ Ўзбекистонда энг юқори пенсия бериладиган ҳудудлар рейтинги эълон қилинганди.