Tesla биринчи чоракда рекорд миқдорда электромобиль етказиб берди
Етказиб бериш занжиридаги узилишлар ва Хитойдаги завод фаолияти тўхтатилиши туфайли автомобиль ишлаб чиқариш ҳажми пасайиб кетди.
Tesla 2022 йилнинг январь-март ойларида рекорд даражада электромобиль етказиб берилганини эълон қилди. Бу ҳақда Reuters хабар бермоқда.
Бироқ етказиб бериш занжиридаги узилишлар ва Хитойдаги завод фаолияти тўхтатилиши туфайли автомобиль ишлаб чиқариш ҳажми пасайиб кетган.
«Бу таъминот занжири узилишлари ва Хитойнинг ‘ноль коронавирус инфекцияси’ сиёсати туфайли жуда қийин чорак бўлди. Tesla жамоаси ва асосий етказиб берувчиларнинг ажойиб иши вазиятни сақлаб қолди», — дея келтирилади нашрда Илон Маскнинг сўзлари.
Маълумотларга кўра, 2022 йилнинг биринчи чорагида Tesla 310 мингдан ортиқ автомобиль етказиб берди, бу 2021 йилнинг шу даврига нисбатан 68 фоизга кўпдир. Шу билан бирга, компания 305,4 минг дона автомобиль ишлаб чиқарган, бу 2021 йилнинг тўртинчи чорагидагидан (305,8 минг дона) бир оз камроқдир.
Ҳаммаси бўлиб Tesla 295 300 дона Model 3 седанлари ва Model Y спорткарларини, шунингдек, 14 700 дона Model С ҳашаматли седанлари ва Model Х премиум йўлтанламасларини сотган.