Тим Кук Apple Украинадаги жамоалари учун барча чораларни кўришини маълум қилди
Apple раҳбари Тим Кук компания томонидан Россияга қандай санкция қўлланилиши ҳақида изоҳ бермади.
Apple бош директори Тим Кук унинг компанияси Украинага гуманитар ёрдам кўрсатишини ва маҳаллий жамоалар учун қўлидан келган барча ишни қилишини айтди. Бу ҳақда у Twitterдаги саҳифасида маълум қилди.
Кукнинг қайд этишича, у Украинада содир бўлаётган воқеалардан жуда хавотирда.
«Ҳозир мен хавф остида бўлган одамлар ҳақида ўйлаяпман ва тинчликка даъват қилаётганларнинг барчасига қўшиляпман», — деб ёзади Кук.
Шу билан бирга, Apple раҳбари Россиянинг хатти-ҳаракатлари ва компания томонидан мамлакатга нисбатан қўлланилиши мумкин бўлган санкциялар ҳақида изоҳ бермади.
Кейинги постда Кук 24 февраль Стив Жобснинг ҳам туғилган куни эканини тилга олди. Apple компаниясининг амалдаги бош директори ўзининг «вақтдан оқилона фойдаланиш, мукаммалликка интилиш ва ўзидан кейин яхшироқ дунё қолдириш» чақириғини эслатди. Жобс кеча 67 ёшга тўлган бўларди.
Аввалроқ Apple Россия банкларининг иловаларини блоклашни бошлагани хабар қилинганди. Шунингдек, Россиянинг санкцияга учраган банк карталари Apple Pay ва Google Pay’да ишламаслиги ҳақида хабар берилди.
