«Укравтогаз» компанияси энергия ташувчиси нархининг кўтарилиши сабабли автомобиль газ тўлдириш компрессор станцияларини (АГТКС) оммавий равишда ёпишни бошлади. Бу ҳақда Enkorr портали ёзмоқда.

«Май ойидан табиий газ нархи кўтарила бошлагани ва сентябрь ойидан бошлаб нархлар максимал даражага етгани сабабли CNG (сиқилган газ — Таҳр.) энг қиммат ёқилғига айланди ва бунинг ортидан савдо ҳажми 90 фоизга камайди», — дейди «Укравтогаз» директори Александр Ватажишин.

Унинг сўзларига кўра, бугунги кунга қадар компания ёқилғи қуйиш шохобчаларининг техник хизмат кўрсатиш харажатларини минималлаштириш мақсадида улардан 32 тасининг ишини тўхтатган. Хом-ашё харажатлари камаймаса, январь ойидан яна 34 та станция ёпилиши режалаштирилган.

«CNG ёнилғи қуйиш станцияси фаолиятини қайта тиклаш учун энергия ташувчининг сотиб олиш нархи ўзгариши керак», — дейди Александр Ватажишин.

Таъкидланишича, давлат ёрдамисиз вазиятни ўнглаб бўлмайди. Ушбу босқичда бутун Украина CNG бозори ўз мижозларини йўқотмоқда, нафақат ушбу компаниянинг, балки бошқа хусусий иштирокчиларнинг ҳам ёқилғи қуйиш шохобчалари ёпилмоқда.

Маълумот учун, Европада газ нархининг ошиши апрель ойида бошланган ва октябрь ойи бошида 1000 доллар чегарасидан ўтиб кетган. Тарихий максимал — минг куб метр учун 2190,4 доллар 21 декабрда қайд этилган.

Мутахассислар инқирозни қитъада қишки газ захираси бандлигининг паст даражаси, асосий етказиб берувчилар томонидан чекланган таъминот ва Осиёда сиқилган табиий газга бўлган талабнинг юқорилиги билан боғламоқда.