Тошкент метрополитенида носозликлар юзага келаётгани маълум қилинди
Метрополитен маъмурияти йўловчиларга мурожаат билан чиқди.
Тошкент метрополитенида носозликлар кузатилмоқда. Бу ҳақда метрополитен матбуот хизмати хабар берди.
Маълум қилинишича, шу кунларда Тошкент метрополитенида ҳаракатланаётган поезд эшиклари очилиб ёпилишида техник носозликлар кузатилиб, йўловчилар учун бир қанча ноқулайликларни юзага келтирмоқда.
Метрополитен маъмурияти йўловчилар хавфсизлигини таъминлаш, эшикка тушаётган юкламаларни оширмаслик, йўловчиларга ноқулайликлар туғдирмаслик мақсадида метродан фойдаланувчиларга поезд вагонларининг эшикларига суянмаслик, эшиклар ёпилаётган вақтда вагон ичига ва ташқарисига ҳаракатланмасликни сўради.
Бундан ташқари, эскалатордан фойдаланиш вақтида мавжуд қоидаларга амал қилиш ва тўғри фойдаланиш лозимлиги эслатиб ўтилган.
Таъкидланишича, метрополитенда тартиб-қоидага амал қилмаслик ҳамда нотўғри ҳаракатланиш вагон эшиклари ва эскалаторларда носозликларнинг келиб чиқиши, муддатидан олдин яроқсиз ҳолга келиб, ҳаракат вақтида турли ҳолатлар юз беришига сабаб бўлмоқда.
«Метродан тўғри фойдаланиш барча йўловчиларнинг ўз манзилига хавфсиз, қулай тарзда, ўз вақтида етиб боришига сабаб бўлади», дейилади хабарда.
Метрополитен маъмурияти барча йўловчиларни огоҳлик ва эҳтиёткорликка чақирди.
Аввалроқ Шавкат Мирзиёев Тошкентда жамоат транспортини ривожлантириш тақдимоти билан танишгани хабар қилинганди. Шунингдек, Тошкент метрополитени учун яна 14 та янги поезд сотиб олиниши ҳақида хабар берилди.
