Microsoft асосчиларидан бири Билл Гейтс аҳолининг ҳукуматга ишончсизлигини 2022 йилнинг асосий қўрқувларидан бири деб таъкидлади. Бу ҳақда CNBC ёзмоқда.

Тадбиркорнинг фикрича, ҳукуматга бўлган ишончсизлик инсониятнинг COVID-19’га қарши курашда эришган ютуқларини секинлаштириши мумкин.

«Халқингиз сизга ишонмаса, янги йирик ташаббусларни қўллаб-қувватламайди. Катта инқироз юз берганда, улар бўронни енгиш учун зарур бўлган йўналишларга камроқ амал қилади», — дейди Гейтс.

Унинг фикрича, давлат институтлари иқлим ўзгариши ва пандемияга қарши курашда асосий ролни ўйнайди, аммо агар аҳоли уларнинг етакчилигини тубдан рад этса, улар самарали бўла олмайди.

Гейтсга кўра, ишончсизлик айниқса пандемия бошланганидан кейин яққол намоён бўлган. Коронавирус ҳақидаги ёлғон ахборот Қўшма Штатларда ҳам, бошқа мамлакатларда ҳам тарқалган, бу эмланганлар сонини сезиларли даражада камайтирган ва пандемия тугашини кечиктирган.

Pew Research Center’нинг пандемиядан олдин ўтказган тадқиқоти шунга ўхшаш тенденцияларни аниқлаганди. Унга кўра, 2019 йилда америкаликларнинг 75 фоизи ватандошларининг федерал ҳукуматга ишончи пасайиб бораётганини айтган. Сўровда қатнашганларнинг яна 64 фоизи бир-бирига бўлган ишончи ҳам пасайиб бораётганини таъкидлаган.

Гейтснинг ишончи комилки, бу муаммоларга сиёсий асосга эга бўлган сарлавҳалар ва ижтимоий тармоқлар айбдор. Microsoft асосчиси ҳукуматлар нотўғри маълумотларга самарали қарши туриш учун онлайн платформаларни тартибга солишлари керак бўлиши мумкинлигини қўшимча қилган.

Аввалроқ Билл Гейтс 2021 йилни сарҳисоб қилгани хабар қилинганди.