Ўзбекистонда жорий йил бошидан буён кўмир, нефть, табиий газ ва газ конденсати қазиб олиш ҳажми камайган.

2026 йил январь июнь ойларида 614,2 минг тонна автомобиль бензини ишлаб чиқарилди. Бу 2025 йилнинг мос даврига (579,7 минг тонна) нисбатан 6% кўп. Шунга қарамай, бензин ишлаб чиқариш ҳажми 2024 йилдаги 675,9 минг тоннага нисбатан 9,1% пастлигича қолмоқда.

Углеводород қазиб олиш ҳажми изчил қисқаришда давом этмоқда. Йилнинг дастлабки олти ойида 18,3 млрд куб метр табиий газ (-16,4%), 313,8 минг тонна нефть (-3,1%) ва 462,1 минг тонна газ конденсати (-19,7%) қазиб олинди.

2024 йилнинг январь июнь ойларига нисбатан пасайиш янада сезиларли бўлди: табиий газ қазиб олиш 18,7% га, нефть 13,9% га, газ конденсати эса 26,1% га камайди.

Шу билан бирга, портландцемент ва дизель ёқилғиси ишлаб чиқаришда ижобий ўсиш суръати сақланиб қолди. Январь июнь ойларида портландцемент ишлаб чиқариш 10,1 млн тоннага етиб, 2025 йилга нисбатан 2%, 2024 йилга нисбатан эса 31,2% га ошди. Дизель ёқилғиси ишлаб чиқариш 568 минг тоннани ташкил этиб, ўтган йилга нисбатан 2,1%, 2024 йилга нисбатан эса 12,5% га кўпайди.

Январь июнь якунларига кўра, кўмир қазиб олиш 2,5 млн тоннагача камайди. Бу ўтган йилнинг мос даврига нисбатан 16,7%, 2024 йилга нисбатан эса 3,8% кам.

Ҳисобот даврида мамлакатда электр энергияси ишлаб чиқариш 5,7% га ошиб, 44,14 млрд кВт·соатга етди. Ўсиш асосан кичик тадбиркорлик субъектлари ҳисобига таъминланиб, улар ишлаб чиқаришни 36,7% га ошириб, 14,31 млрд кВт·соатга етказди. Йирик корхоналар эса электр энергияси ишлаб чиқаришни 4,6% га қисқартириб, 29,83 млрд кВт·соат ишлаб чиқарди.

Айни пайтда йирик корхоналар томонидан иссиқлик энергияси ишлаб чиқариш 18,1% га камайиб, 9,28 млн Гкални ташкил этди.