Apple иқтидорли ходимларига Meta’га ўтиб кетмаслик учун бонуслар берди
Компания шу орқали ходимларни ишда қолишга рағбатлантирмоқчи.
Apple компанияси аппарат ва дастурий таъминот ҳамда операцион бўлимларидаги баъзи муҳандисларга акциялар шаклида бонуслар тарқатди. Бу ҳақда Bloomberg хабар берди.
Қайд этилишича, акциялар ходимларга тўрт йил ичида тўлиқ ўтади. Apple шу орқали ходимларни компанияда қолишга рағбатлантиради.
Бонуслар муҳандисларга юқори кўрсаткичлари учун мукофот сифатида берилган ва унинг миқдори 50 минг доллардан 180 минг долларгача бўлган. Кўпчилик 80 минг, 100 минг ёки 120 минг доллар миқдорида акция олган.
Хабарга кўра, ушбу тўловлар Apple компаниясининг асосий иш ҳақи, фонд бирликлари ва пул бонусини ўз ичига олган мунтазам компенсация пакетининг бир қисми эмас. Apple вақти-вақти билан ходимларга қўшимча пул мукофотлари тўлайди, аммо охиргисининг миқдори одатдагидан кўп бўлган.
Bloomberg нашрининг ёзишича, Apple Силикон водийси ва ундан ташқаридаги компаниялар билан рақобатлашмоқда, Meta эса алоҳида хавф туғдиряпти. Цукербергнинг компанияси сўнгги бир неча ой ичида 100 га яқин Apple муҳандисларини ишга олган.
Аввалроқ Apple Нью-Йоркдаги барча дўконларини ёпгани хабар қилинганди.