АҚШда январь ойидаги инфляция 40 йиллик рекордни янгилади
Инфляция маълумотлари эълон қилинганидан сўнг АҚШ фонд индекслари тушиб кетди.
АҚШда инфляция 40 йиллик энг юқори даражага етди. Бу ҳақда The Wall Street Journal АҚШ меҳнат департаменти маълумотларига таяниб хабар берди.
Маълум қилинишича, январь ойида АҚШда инфляция йиллик ҳисобда 7,5 фоизгача тезлашган ва 40 йил ичидаги энг юқори даражага етган. Охирги марта нархлар 1982 йилдан бери рекорд даражага кўтарилган, ўшанда АҚШ инфляцияси 7 фоизни ташкил қилган эди.
Автомобиллар, мебельлар ва маиший техника, шунингдек, узоқ муддат фойдаланиладиган бошқа товарлар нархларининг ошиши инфляция даражасига сезиларли таъсир кўрсатган. Шунингдек, инфляциянинг тезлашиши пандемия фонидаги талаб ва таклифнинг номутаносиблиги билан ҳам боғлиқ.
Аксарият иқтисодчилар корхоналарнинг мослашиши ва талабнинг нормаллашиши сабабли нархларнинг ошишини кутмоқда. Шу билан бирга, таъминот билан боғлиқ муаммолар қачон нархларга босимни юмшатиш учун етарли даражада енгиллашиши аниқ эмас.
Бундан ташқари, гўшт, тухум ва цитрус мевалари нархларининг барқарор ўсиши, шунингдек, энергия нархи ўсишининг заифлашуви белгилари қайд этилган. Таъкидланишича, нефть нархининг кескин ошиши бензин нархининг ҳам ошишига хизмат қилади.
«Ставкаларни ошириш таъминот занжири таранглигини ва ишчи кучи танқислигини бартараф этиш учун ҳеч қандай ёрдам бермайди. Лекин, иқтисодиётнинг бироз заифлашишига ҳисса қўшиши ва заифроқ ўсиш орқали талаб ҳамда таклифнинг мувозанатини тиклашга имкон бериши мумкин», — деган ING бош халқаро иқтисодчиси Жеймс Найтли.
Таъкидланишича, 2021 йили АҚШ ялпи ички маҳсулоти 5,5 фоизга ўсган, бу 1984 йилдан бери энг тез суръатдир. Бундай динамика кучли меҳнат бозори билан изоҳланади: сўнгги уч ойда иш берувчилар 1,6 миллион иш ўрни яратиб, иш ҳақини оширган. Бу, ўз навбатида, инфляциянинг ошишига ҳам олиб келиши мумкин. Декабрь ойида йиллик иш ҳақи ўсиши 4,5 фоизни ташкил этган — бу 2002 йилдан бери рекорд кўрсаткичдир.
Январь ойи охирида АҚШ Федерал захира тизими инфляция 2 фоиздан анча юқори даражада сақланиб қолса ва кучли меҳнат бозори шароити кузатилса ставкани оширишга тайёрлигини эълон қилган. АҚШ регулятори охирги марта ставкани 2018 йилда оширган эди.
Инфляция маълумотлари эълон қилинганидан сўнг АҚШ фонд индекслари тушиб кетган. Эрта савдоларда S&P 500 1,2 фоизга, Nasdaq Composite — 1,75 фоизга, Dow Jones Industrial Average эса 0,6 фоизга пасайган. Шу билан бирга, 10 йиллик ғазначилик бўйича даромадлилик 2,5 йил ичида биринчи марта қисқа муддатда 2 фоиздан ошган. Энг юқори чўққисида у 2,001 фоизга етган, лекин кейин 1,986 фоизга қайтган.
Аввалроқ Жо Байден давридаги АҚШ иқтисодиёти қанчалик ўзгаргани хабар қилинганди. Шунингдек, АҚШ иқтисодиёти 1984 йилдан бери энг юқори ўсишни қайд этгани ҳақида хабар берилди.