Билл Гейтс ва Крис Сакка оғир саноатнинг «яшил» ривожланишига ёрдам бериш учун Antora стартапига 50 миллион доллар сармоя киритади. Бу ҳақда CNBC хабар бермоқда.

Маълум қилинишича, Билл Гейтснинг Breakthrough Energy Ventures инвестиция компанияси Крис Сакканинг Lowercarbon Capital компанияси билан ҳамкорликда Antora Energy стартапига 50 миллион доллар сармоя киритади. Стартап қайта тикланадиган манбалардан чиқиндиларсиз энергия олиш билан шуғулланади.

Битим шунингдек, Shell нефть-газ компаниясининг венчур бўлими — Shell Ventures иштирок этишни режалаштирмоқда, бироқ унинг ҳиссаси миқдори аниқланмаган.

Сакка компаниясининг аниқлик киритишича, Antora қуёш энергиясидан фойдаланган ҳолда иссиқлик ва электр энергияси ишлаб чиқаради, бу эса энергияни газни ёқишдан кўра арзонроқ қилади.

«Нефть ва газ саноати иқлим ўзгариши хоҳлаганча рад этиши мумкин, аммо харидорлар ҳар доим арзонроқ вариантни танлайди, бу эса қазиб олинадиган ёқилғидан узоқлашишни англатади», — деган Сакка.

Газ қозонларини алмаштириш учун мўлжалланган Antora термал батареялари кичик уй ёки катта юк машинасининг тиркамаси ўлчамига ўхшаш бўлади. Прогноз қилинишича, агар стартап муваффақиятли бўлса, унинг мижозлари орасида қатор йирик саноат компаниялари ҳам бўлади. Antora бош директори Эндрю Понекнинг сўзларига кўра, лойиҳани кенгайтириш 2023 йил охиригача бошланмайди. Понек қуёш энергиясидан иқтисодиётнинг турли тармоқларида фойдаланишни режалаштирмоқда.

Маълумот ўрнида, Antora 2018 йилда ташкил этилган. Компания қайта тикланадиган энергияни иссиқликка айлантиради, уни қаттиқ углерод блокларида сақлайди. Кейинчалик, сақланган энергия пўлат ёки цемент каби материалларни ишлаб чиқариш учун саноат жараёнларида ишлатилади. Бундан ташқари, агар керак бўлса, уни электр энергиясига айлантириш мумкин.

Аввалроқ Билл Гейтс кейинги пандемияни қандай бартараф этиш ҳақида китоб ёзгани хабар қилинганди. Шунингдек, Билл Гейтс фонди «яшил» технологияларга 15 миллиард доллар сармоя киритиши ҳақида хабар берилди.