Миллиардер Ричард Брэнсон Virgin Galactic космик компаниясининг 15,6 миллион дона акциясини сотди. Бу ҳақда АҚШ Қимматли қоғозлар ва биржалар комиссияси сайтидаги ҳужжатда маълум қилинган.

Қайд этилишича, ҳар бир акциянинг қиймати 19,25 долларни ташкил этган. Яъни умумий ҳисобда Брэнсон 300,3 миллион долларга яқин маблағ йиққан. SEC сайтидаги ҳужжат 15 ноябрь санаси билан белгиланган.

Virgin Galactic акцияларининг қиймати 16 ноябрь куни савдолар очилганидан кейинги дастлабки дақиқаларда кескин пасайди: биринчи дақиқаларда тахминан 4 фоизга арзонлашди, буни Nasdaq биржаси сайтидаги маълумотлар тасдиқлайди. Нарх ҳар бир акция учун 18,2 долларга тушди.

Bloomberg маълумотларига кўра, 15,6 миллион дона акциялар Virgin Galactic капиталининг тахминан 6 фоизини ташкил этади. Битимдан сўнг Брэнсон компаниянинг 11,9 фоиз улушини ўзида сақлаб қолди. Миллиардер компаниянинг энг йирик акциядори бўлиб қолмоқда: унинг улуши тахминан 600 миллион долларни ташкил этади.

Маълум қилинишича, акцияларни сотишдан тушган маблағ Брэнсоннинг саёҳат ва дам олиш бизнесини қўллаб-қувватлашга, шунингдек, янги ва мавжуд бизнесларини ривожлантиришга йўналтирилади.

Аввалроқ Миллиардер Роман Абрамовичнинг самолёти сотувга қўйилгани ҳақида хабар берилганди.