Британия компаниялари тўрт кунлик иш ҳафтасини тажриба тариқасида синаб кўрмоқчи. Бу ҳақда «Коммерсантъ» хабар берди.

Британиянинг 30 га яқин компаниялари 4 Day Week UK пилот дастурида иштирок этади. Унда компанияларнинг ишлаб чиқариш самарадорлигини яхшилаш ва ходимларнинг фаровонлигини ошириш учун тўрт кунлик иш ҳафтасининг ижобий ва салбий томонлари баҳоланади.

Дастурга биринчи бўлиб рўйхатдан ўтган компаниялар қаторида Япониянинг Canon компанияси Британия бўлими — Canon Medical Research Europe, Autonomy мустақил таҳлил маркази, Blink ва Reboot рақамли маркетинг компаниялари, Elektra Lighting консалтинг компанияси ва бошқалар бор.

Буюк Британияда 4 Day Week дастури янги зеландиялик тадбиркорлар Эндрю Барнс ва Шарлотта Локхарт томонидан ишлаб чиқилган бўлиб, Оксфорд ва Кембриж, шунингдек, Бостон коллежи (АҚШ) олимлари кўмагида ташкил этилган.

Сўнгги йилларда олиб борилган тадқиқотлар шуни кўрсатадики, қисқароқ иш ҳафтасига ўтиш меҳнат унумдорлигини оширишга олиб келади. Масалан, Microsoft ўзининг Япониядаги офисида тўрт кунлик ҳафтани синаб кўрганида унумдорлик 40 фоизга ошган.

Дастур иштирокчилари 2022 йилнинг июнь ойидан бошлаб ва кейинги олти ой давомида ходимларни иш ҳақини камайтирмасдан тўрт кунлик иш ҳафтасига ўтказиш мажбуриятини олади. Ташкилотчилар «100:80:100» моделидан фойдаланади: яъни 80 фоиз вақт учун иш ҳақининг 100 фоизини тўлаш ва 100 фоиз унумдорликни сақлаш.

Компаниялар фаолияти ва ходимларнинг фаровонлигидаги ўзгаришлар иштирокчи университетлар олимлари томонидан назорат қилинади. Дастур натижалари келгуси йилда эълон қилинади, шундан сўнг Британия ҳукумати ишчиларни 32 соатлик иш ҳафтасига ўтказиш қанчалик самарали эканини аниқлаш учун уларни ўрганади.

«Энди биз пандемиядан чиқиб, ҳамма нарсани аввалгидан яхшироқ қилишга ҳаракат қилмоқдамиз, кўп одамлар иш ва дам олиш ўртасидаги мувозанатни яхшилашни хоҳлайди. Одамлар умуман дам олишганига 100 йил бўлди ва бизнинг фикримизча, тўрт кунлик ҳафта узоқ вақт давом этиши керак», — деган 4 Day Week UK директори Жо Райл лойиҳани шарҳлар экан.

Унинг сўзларига кўра, бу лойиҳа компаниялар учун ҳам, ходимлар учун ҳам фойдали бўлади. 4 Day Week UK дастурига аризалар март ойининг охиригача қабул қилинади. Ташкилотчилар иштирокчилар орасида йирик компаниялар ҳам бўлишига умид қилмоқда.

Аввалроқ «Омикрон» Буюк Британия иқтисодиётига қанча зарар келтириши ҳисоблаб чиқилгани хабар қилинганди. Шунингдек, Ўзбекистон Буюк Британиянинг Кенгайтирилган GPS тизимига қўшилган илк давлат бўлгани ҳақида хабар берилди.