Буюк Британия парламентининг Жамоатлар палатаси депутати Крис Брайант россиялик миллиардер Роман Абрамовични Англиянинг «Челси» футбол клуби эгалигидан маҳрум этишга чақирди. Бу ҳақда Financial Times хабар берди.

Маълум қилинишича, депутат расмийлар бизнесменнинг айрим активларини, жумладан, унинг 152 миллион фунт стерлинг (203 миллион доллар) қийматидаги мол-мулкини мусодара қилиш масаласини кўриб чиқиши кераклигини таъкидлаган. Forbes Абрамовичнинг вакилига сўров юборган.

Буюк Британия Украинадаги махсус ҳарбий операцияга жавобан Россияга қарши янги санкциялар тайёрламоқда. Бош вазири Борис Жонсон 24 февраль куни Лондон кун охиригача иттифоқчилар билан «Россия иқтисодиётини тўхтатиш учун мўлжалланган йирик иқтисодий санкциялар пакети»ни келишиб олишини айтди.

Олдинроқ Буюк Британия россиялик Forbes рўйхатидаги уч тадбиркорга нисбатан санкциялар жорий қилганди. Булар Геннадий Тимченко, Борис Ротенберг ва Игор Ротенберг эди.

Маълумот ўрнида, Абрамович 2003 йилда Англиянинг «Челси» клубини сотиб олган. Бу вақт ичида клуб беш марта Англия чемпиони бўлган, беш марта Англия кубогини қўлга киритган, икки марта Чемпионлар лигасида (клублар учун Европадаги энг кучли халқаро турнир) ва икки марта Европа Лигасида (иккинчи энг кучли турнир) ғолиб чиққан.

Бундан ташқари, 2018 йилда Британия расмийлари Абрамовичнинг мамлакатга кириши учун янги инвестор визасини беришни кечиктирганди. Тадбиркор Швейцарияда яшаш учун рухсатнома сўраб мурожаат қилган, бироқ уни қайтариб олган.

Худди шу йили тадбиркор Исроил фуқаролигини олган. 2021 йилда у ҳам Португалия фуқаролигини олганди, бироқ шу йилнинг январь ойида мамлакат расмийлари фуқароликни олиш қонунийлиги текширилишини айтган.

Аввалроқ Миллиардер Абрамович Қора денгиз бўйидаги мулкларини яна биттага оширгани хабар қилинганди. Шунингдек, Миллиардер Абрамовичнинг ўғли Zoltav нефть компаниясидаги улушини 98,9 фоизга етказиши ҳақида хабар берилди.