Марк Цукерберг Meta акциялари қулаши туфайли дунёнинг энг бой 10 нафар кишиси рўйхатидан чиқди. Бу ҳақда Forbes хабар берди.

Маълум қилинишича, Meta (собиқ Facebook) асосчиси Марк Цукербергнинг бойлиги 27,1 миллиард долларга (23,67 фоизга) камайди. Унинг умумий бойлиги 87,4 миллиард долларни ташкил қилмоқда.

Қайд этилишича, Meta асосчиси энди Forbes талқинига кўра дунёдаги энг бадавлат бизнесменлар ўнталигидан чиққан. Цукерберг рўйхатнинг 12-қаторини эгаллаб турибди.

Ҳисобот эълон қилиниши чоғида Meta акцияларининг пасайиши туфайли Цукерберг капиталининг бир қисмини йўқотган. 2 февралдаги кенгайтирилган савдолар чоғида компания қоғозлари 23 фоизга қисқарган. Meta тўртинчи чоракда Facebook’нинг фаол фойдаланувчилари сони нафақат ўсмагани, балки аввалги уч ойга нисбатан ҳам камайгани ҳақида берган хабари инвесторларнинг ҳафсаласини пир қилган.

Бундан ташқари, компания чораклик даромади кутилганидан паст бўлганини маълум қилган. Meta’дан кейин Pinterest (деярли 10 фоиз), Snap (18 фоиздан ортиқ) ва Twitter (тахминан 8 фоиз) акциялари пасайишни бошлаган.

Савдо платформаси маълумотларига кўра, 3 февралдаги савдолар давомида Meta акциялари пасайишда давом этган ва 25,46 фоизга қисқариб, 240,78 доллардан сотилган.

Маълумотларга кўра, капиталнинг бу қисқариши тарихдаги бир кун ичида бойликнинг энг катта пасайиши бўлган. Январь ойида дунёнинг энг бадавлат одами Илон Маск Tesla акциялари тушиб кетиши туфайли 24,5 миллиард доллар йўқотганди.

Ноябрь ойида у Twitter фойдаланувчиларидан компания акцияларини сотиш керакми, деган сўров ўтказиш вақтида 50 миллиард доллардан кўпроқ йўқотган. Бироқ, ўшанда унинг бойлиги бир неча кун ичида пасайганди.

Аввалроқ Марк Цукерберг ўзининг криптовалюта лойиҳасини тўхтатиши хабар қилинганди. Шунингдек, Цукербергнинг Meta компанияси 2021 йилнинг «энг ёмони» деб топилгани ҳақида хабар берилди.