Европа иттифоқи яна 160 нафар россияликка қарши санкциялар эълон қилди
Санкцияга тушганлар орасида миллиардерлар ва Федерал Кенгаш аъзолари бор.
Европа Иттифоқи Россиянинг Украинага ҳарбий ҳужумига жавобан янги санкциялар жорий қилди. Бу ҳақда Еврокомиссия сайтидаги хабарда айтилади.
Унга кўра, 160 киши, жумладан, Россиянинг Донецк ва Луганск билан дўстлик ҳамда ҳамкорлик шартномаларини ратификация қилган 14 нафар россиялик миллиардер ва Федерация Кенгашининг 146 нафар аъзоси чекловларга дучор бўлади. Санкциялар Россияга денгиз навигация технологиялари экспортига таъсир қилади.
Бундан ташқари, ЕИ Россияга қарзлар, кредитлар ҳамда «қимматли қоғозларни ўтказиш» бўйича мавжуд чекловларни криптовалюталар ва бошқа крипто активлар операцияларини ўз ичига олган ҳолда кенгайтиради.
Шунингдек, Европа Иттифоқи Беларусь банк секторига қарши санкциялар жорий этади. Беларусь тараққиёт банки, «Белагропромбанк» ва «Дабрабит» банклари SWIFT халқаро тўлов тизимидан узилади.
Тақиқ Беларусь Марказий банки билан захиралар ёки активларни бошқариш билан боғлиқ ҳар қандай операцияларни, шунингдек, Беларусь билан савдо ва унинг иқтисодиётига инвестицияларни давлат томонидан молиялаштиришни ўз ичига олади. Европа Иттифоқи, шунингдек, республикага евродаги банкноталарни етказиб беришни ҳам тақиқлади.
Бундан ташқари, Европа Иттифоқи Европа савдо майдончаларида Беларусь давлат корхоналари улушлари билан боғлиқ хизматларни кўрсатиш ва рўйхатга олишни(чора 12 апрелдан кучга киради), беларуслик мижозларга евродаги қимматли қоғозларни сотиш, ЕИ марказий депозитарийларида беларуслик мижозларнинг ҳисобларини юритиш ва Беларусь фуқароларидан 100 минг евродан ортиқ депозитларни қабул қилишни тақиқлайди.
Аввалроқ АҚШ сенаторлари Россия захираларидаги олтин билан операцияларни тақиқлашни таклиф қилгани ҳақида хабар берилганди.
