Германия Россиянинг Луганск ва Донецкни тан олишига жавобан «Шимолий оқим-2» газ қувурини сертификатлашни тўхтатишга қарор қилди. Бу ҳақда Financial Times хабар берди.

Маълум қилинишича, Шольц Германия Иқтисодиёт вазирлигидан Федерал тармоқ агентлигига тақдим этилган мамлакатга таъминот хавфсизлиги бўйича ҳисоботини қайтариб олишни сўраган.

«Бу қарор фақат техник қимматга эга бўлиб туюлиши мумкин, аммо бу айни пайтда қувурнинг сертификатланмаганлигига ишонч ҳосил қилиш учун зарур маъмурий қадам ҳисобланади», — деган Германия канцлери. Ушбу сертификатсиз қувурни ишга тушириш мумкин эмас, дея тушунтирган у.

Қайд этилишича, «Шимолий оқим-2» лойиҳаси 2021 йилнинг сентябрида якунланган. Уни ишга тушириш учун Nord Stream 2 AG қувури оператори Германия ва Европа регуляторларидан рухсат олиши керак.

Ноябрь ойида немис регулятори лойиҳанинг Германия қонунларига мос келмаслиги сабабли сертификатлашни аллақачон тўхтатиб қўйган эди, бироқ 2022 йил бошида «Шимолий оқим-2» оператори немис шўба корхонасини очиш орқали бу келишмовчиликни бартараф этган.

«Бугун вазият тубдан ўзгарган. Шунинг учун ҳам биз бу вазиятни сўнгги воқеалар нуқтаи назаридан қайта кўриб чиқишимиз керак», — деган Шольц.

Маълумот ўрнида, 21 февраль куни Россия Президенти Луганск ва Донецкнинг мустақиллигини тан олиш тўғрисидаги фармонларни ҳамда ушбу республикалар билан дўстлик, ҳамкорлик ва ўзаро ёрдам тўғрисидаги шартномаларни имзолади. Бир кундан кейин Давлат Думаси ушбу шартномаларни бир овоздан ратификация қилди. Путин, шунингдек, рус қўшинларига Луганск ва Донецкда «тинчликни сақлашни таъминлаш» ҳақида кўрсатма берди.

Аввалроқ Байден Россия ва Украина ўртасида уруш чиқса, «Шимолий оқим-2»ни тўхтатишга ваъда бергани хабар қилинганди. Шунингдек, Луганск ва Донецк тан олинганидан сўнг Россия фонд бозори қулагани ҳақида хабар берилди.