Германия иқтисодиёт вазири дунёни «энг даҳшатли» очарчиликдан огоҳлантирди
Унинг фикрича, дунё бўйлаб озиқ-овқат нархлари ўртача учдан бир қисмга кўтарилган ва ҳозирда «рекорд даражада» турибди.
Германия иқтисодий ҳамкорлик ва тараққиёт вазири Свенья Шульце СOVID-19 пандемияси, қурғоқчилик ва Украинадаги воқеалар оқибатлари глобал озиқ-овқат муаммосини янада кучайтириши мумкинлигини айтди.
Германия расмийсига кўра, юқоридаги ҳолатлар туфайли нархларнинг ошиши бутун дунё бўйлаб оммавий очарчилик ва миллионлаб одамларнинг ўлимига олиб келиши мумкин.
«Жаҳон озиқ-овқат дастурининг ҳисоб-китобларига кўра, дунёда 300 миллион одам очликдан азият чекмоқда ва бу ҳисоб-китоблар доимий равишда юқорига қараб ўзгартирилади», — деди Шульце Bild am Sonntag нашрига берган интервьюсида.
Унинг фикрича, дунё бўйлаб озиқ-овқат нархлари ўртача учдан бир қисмга кўтарилган ва ҳозирда «рекорд даражада» турибди. Бу, шунингдек, кўплаб мамлакатларнинг Украина ва Россиядан қишлоқ хўжалиги маҳсулотларини импорт қилишга қарамлиги билан боғлиқ.
«Биз Иккинчи жаҳон урушидан бери энг даҳшатли очарчиликка ва миллионлаб қурбонларга дуч келишимиз мумкин», — дея прогноз қилди Шульце.
Апрель ойи охирида БМТ озиқ-овқат ташкилотининг Москвадаги ваколатхонаси директори Олег Кобяков Украинадаги воқеаларни шарҳлар экан, қуролли тўқнашувлар «бизни очликка қарши курашда орқага тортади», деганди.
Унинг таъкидлашича, Украина ва Россия «дунёнинг нон савати» бўлиб, «жаҳон озиқ-овқат бозорига ғалла етказиб беришнинг учдан бир қисмини ва кунгабоқар ёғининг деярли учдан икки қисмини» таъминлайди.
Аввалроқ февраль ойида жаҳон озиқ-овқат нархлари рекорд даражага етгани ҳақида хабар берилганди.