Google ходимлари компаниянинг коронавирусга қарши эмлаш сиёсатига риоя қилишдан бош тортса, иш ҳақидан айрилади ва якунда ишдан бўшатилади. Бу ҳақда компаниянинг ички ҳужжатларига таяниб CNBC хабар берди.

Қайд этилишича, ходимлар 3 декабргача эмлаш ҳолати ҳақида хабар бериши ва далил тариқасида эмланганлик ҳақидаги ҳужжатни тақдим қилиши керак бўлган.

18 январгача эмлаш қоидаларига риоя қилмаган ходимлар 30 кунлик «тўланадиган маъмурий таътил»га юборилади. Шундан сўнг, Google уларни олти ойгача «тўланмайдиган шахсий таътил»га юборади, кейин эса ишдан бўшатади. Тўланмаган таътилда бўлган ходимлар дастлабки 92 кун давомида нафақа оладилар.

Google 2022 йилда ходимлардан ҳафтада уч кун офисдан ишлашни талаб қилмоқчи. Байден маъмурияти 100 ёки ундан ортиқ ходимга эга бўлган АҚШ компанияларига 18 январга қадар ходимларни тўлиқ эмлаш ёки мунтазам равишда тестдан ўтказишни буюрган.

Шу билан бирга, Google 150 мингдан ортиқ ходимдан эмлаш ҳолатини ички тизимларга юклашни ва офисга боришни режалаштирган ёки йўқлигини хабар қилишни сўраган. Бир неча юз нафар ходимлар бундай қоидаларга қарши: улар тегишли манифестни имзолашга ҳам улгурган.

Ўз навбатида, Google ходимларига диний ёки тиббий сабабларга кўра эмлашдан озод қилишни талаб қилишлари мумкинлигини маълум қилган.

Аввалроқ Google 2022 йилда Android ўйинларини Windows тизимига ўтказиши хабар қилинганди.