Грузиялик миллиардер ва собиқ бош вазир Бидзина Иванишвили Бермуда оролларида Швейцариянинг Credit Suisse банкига қарши судда ғалаба қозонди. Бу ҳақда Financial Times хабар берди.

Маълум қилинишича, тадбиркор банкнинг собиқ менежери томонидан содир этилган ҳаракатлари туфайли йўқотган пуллари учун товон пули талаб қилмоқда. Бермуда суди қарори келаси ҳафта эълон қилинади.

Манбаларнинг тасдиқлашича, қарор Иванишвили иши билан боғлиқ ва тадбиркор фойдасига чиқарилган. Credit Suisse бу бўйича изоҳ беришдан бош тортди. Иванишвили ҳам шундай йўл тутди.

Credit Suisse 23 март куни ўз веб-сайтидаги баёнотида банкнинг маҳаллий тузилмаси — Credit Suisse Life Bermuda’га қарши Бермуда судининг қарори эълон қилиниши кутилаётгани ҳақида огоҳлантирди. Банк қайси суд иши бўйича қарор кутилаётганига аниқлик киритмаган, бироқ бу Иванишвилининг даъвоси билан боғланмоқда.

Банк суд уни 500 миллион доллардан кўпроқ товон тўлашга мажбурлаши мумкинлигини таъкидлади. Credit Suisse олдиндан заҳиралар яратганини, уларни кўпайтириш зарурлигини кўриб чиқишини ва барча қонуний воситалар билан ҳаракат қилишга тайёрлигини маълум қилди.

Шунингдек, Иванишвили Сингапур ва Янги Зеландияда ҳам Credit Suisse билан судга даъво қилмоқда, даъволарнинг умумий миқдори тахминан 800 миллион долларни ташкил этади. Маълумотларга кўра, Бермудадаги иш миллиардер ва банк ўртасидаги қарама-қаршиликда асосий ҳисобланади, чунки бу прецедент яратиши мумкин.

Иванишвилининг сўзларига кўра, у банкнинг собиқ менежери Патрис Лескодроннинг ҳаракатларидан жабр кўрган. У 2018 йилда фирибгарликда айбланиб, 2019 йилда озодликка чиққан ва 2020 йилда ўз жонига қасд қилган. Лескодрон 2008 йилдаги молиявий инқироз пайтида йўқотишларни мижозларнинг пуллари ҳисобидан қоплашни бошлаганини тан олган.

Швейцария банк регулятори FINMA’нинг эълон қилинган ҳисоботига кўра, Credit Suisse менежернинг ҳаракатлари учун ҳайфсан олган, бироқ банк тегишли чоралар кўрмаган. Credit Suisse буни рад этмоқда ҳамда ҳисобот эълон қилиниши муносабати билан у Лондонда Иванишвили ва бошқа инвесторларга қарши даъво аризаси билан чиқди.

Маълумот ўрнида, Бидзина Иванишвили Грузиянинг энг бадавлат тадбиркорлари рўйхатида биринчи ўринни эгаллаган. Иванишвилининг бойлиги 4,8 миллиард долларга баҳоланмоқда.

Аввалроқ Credit Suisse санкцияга учраган россиялик миллиардерларнинг кредит маълумотларини йўқ қилишга урингани хабар қилинганди. Шунингдек, Швейцариядаги энг йирик банк мижозларининг маълумотлари интернетга сиздирилгани ҳақида хабар берилди.