«Халқ банки» фуқароларга ҳар ой 4 трлн сўмлик нафақа ва тўловлар берилаётганини маълум қилди
Шунингдек, банк 97 минг нафарга яқин хотин-қизга 1,2 трлн сўмлик кредитлар ажратган
Ўзбекистонда қарийб 5 миллион фуқарога ҳар ой 4 триллион сўмлик 12 турдаги пенсия, нафақа ва бошқа ижтимоий тўловлар амалга оширилмоқда. Бу ҳақда АОКАда бўлиб ўтаётган матбуот анжуманида хабар берилди.
Маълум қилинишича, «Халқ банки» томонидан «Аёллар дафтари»га киритилган ва тадбиркорлик қилиш истагини билдирган 97 минг нафарга яқин хотин-қизга 1,2 триллион сўмлик кредитлар ажратилган.
Шунингдек, «Оилавий тадбиркорлик»ни ривожлантириш давлат дастурлари доирасида 142 мингдан ортиқ фуқарога 3,1 триллион сўмлик имтиёзли кредитлар ажратилган.
Қайд этилишича, муаммоли кредитларни ундириш бўйича ҳудудлар кесимида режа-график ишлаб чиқилган ва марказий аппаратдан 252 нафар ходим «мижозбай» ишлаш мақсадида ҳудудларга юборилган.
Аввалроқ Ўзбекистонда пенсия ва нафақа олувчилар сони маълум қилинганди. Шунингдек, «Халқ банки» ўз мижозларига мурожаат билан чиққани ҳақида хабар берилди.
